Májiliste aqparat máselelerine qatysty qujat maquldandy

NUR-SULTAN. QazAqparat - Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine aqparat máseleleri boıynsha ózgerister men tolyqtyrýlar engizý týraly» zań jobasy maquldandy, dep habarlaıdy QazAqparat tilshisi.

QR Aqparat jáne qoǵamdyq damý mınıstri Aıda Balaevanyń aıtýynsha, ózgerister eki negizgi mindetti sheshýge baǵyttalǵan. Birinshiden, baqylaý men jaýapkershilikti kúsheıtý, ıaǵnı aqparatqa qol jetkizý salasyndaǵy jaýapty ókiletti organdy anyqtaý men onyń quzyretin aıqyndaý eskerilgen.

Sondaı-aq, árbir memlekettik organda ókiletti qurylym nemese osy saladaǵy jaýapty qyzmetkerdi belgileý usynylady.

Ekinshiden, zańnyń qoldanys aıasyn keńeıtý úshin memlekettik fýnktsııalardy oryndaýshy uıymdardy aqparat ıeleri qataryna jatqyzý jáne kvazımemlekettik sektor men basqa da uıymdardy ashyq derekterdi jarııalaýǵa mindetteý usynylady.

«Zań jobasyna otandyq BAQ-tyń básekege qabilettigin arttyrý boıynsha birqatar túzetýler engiziledi. Osy oraıda memlekettik aqparattyq saıasattyń biryńǵaı júıesin qurý eskerilgen. Ol úshin salalyq vedomstvoǵa respýblıkalyq jáne óńirlik deńgeıdegi memlekettik aqparattyq tapsyrysty ornalastyrýdyń biryńǵaı tártibin aıqyndaý boıynsha ókilettik berý usynylady. Memlekettik aqparattyq saıasatty qalyptastyrý jónindegi respýblıkalyq jáne óńirlik komıssııalardyń mártebesin zań júzinde bekitedi. Onyń quramyna úkimettik emes uıymdar, buqaralyq aqparat quraldary jáne memlekettik organ ókilderi teń dárejede engiziletin bolady», - dep túsindirdi A. Balaeva.