Májilismender vaktsına sapasyna mán berýdi surady
«Qazaqstanda vaktsınalaý 21 juqpaly aýrýlarǵa qarsy tegin júrgiziledi. Aldyn ala ekpelermen jyl saıyn 5 mıllıon adam qamtylady, onyń 1,2 mıllıony balalar. Jyl saıyn respýblıkalyq bıýdjetten halyqty vaktsınalaý úshin qarjy bólinedi. Eger 2016 jyly 24 mlrd. teńge bólinse, 2017 jylǵa 30 mlrd.-tan astam teńge josparlanǵan. Alaıda, sońǵy 10 jylda ekpeden bas tartqan adamdardyń sany bir myńnan 2016 jyly 8239-ǵa deıin jetti. Bas tartýdyń negizgi sebepterine toqtalsaq, jeke sebep boıynsha 44,7 (3686 adam) paıyzdy, vaktsınaǵa senbeý - 7,8 paıyzdy (646), sondaı-aq ınternet resýrstar men BAQ arqyly jaǵymsyz aqparat saldarynan 6,2 paıyzdy (511) qurady»,- dedi depýtat Zaǵıpa Bálıeva QR Úkimet basshysy Baqytjan Saǵyntaevtyń atyna joldanǵan depýtattyq saýalda.
Osy oraıda Májilistiń bir top depýtattary QR Bala quqyqtary jónindegi ýákil Z. Bálıevanyń bastamasymen Úkimetten vaktsınanyń sapasyna asa kóńil bólýdi surady.
«QR Úkimetiniń 2009 jylǵy 30 qazandaǵy qaýlysymen bekitilgen Emdik dári-dármekterdiń aldyn alý preparattaryn, medıtsınalyq qajetti ónimderdi, medıtsınalyq tehnıkalardy, farmatsevtıkalyq qyzmetterdi satyp alý erejelerine sáıkes, biryńǵaı dıstrıbıýter konkýrstyq negizde ekpelerdi satyp alý rásimin júrgizedi. Mundaı jaǵdaıda sapasy tómen vaktsınalardy alý qaýpi bar. Densaýlyq saqtaýdyń búkilálemdik uıymy, ıÝNISEF usynǵan sertıfıkattalǵan óndirýshi zaýyttardan tikeleı eń úzdik vaktsınalardy satyp alý qajet. Munymen qosa, balalardyń densaýlyq jaǵdaıyn eskere otyryp, ekpeni jasaý qajet», - dep toqtaldy depýtat.
Onyń paıymynsha, osyǵan baılanysty ekpeni egý úshin preparattardy satyp alý erejelerine vaktsınanyń eń úzdigin alý bóliginde ózgerister engizý qajet.