Májilismender Túrkistan oblysyndaǵy araqtan bas tartqan aýylǵa bardy

ASTANA. QazAqparat – Parlament Májilisiniń tóraǵasy Erlan Qoshanov pen depýtat Rýslan Berdenov jumys saparymen Túrkistan oblysy Saıram aýdanynyń Qutarys aýylyna bardy, dep habarlaıdy QazAqparat.

Bes myńnan astam halqy bar aýyl alkogolden tolyq bas tartqanymen tanymal, onyń ornyna qymyz jáne basqa da zııansyz sýsyndardy artyq kóredi.

Sondaı-aq aýyl «Ozen» qaıyrymdylyq qorynyń «100 qazaq aýyly» baǵdarlamasy aıasynda test platformasy retinde tańdalǵan.

Májilismendermen kezdesýde joba avtorlary qordyń qyzmeti men maqsattary týraly aıtyp berdi.

«Bizdiń maqsatymyz daryndy balalarǵa arnalǵan bilim berý jáne sport, shaǵyn kásipkerlik, medıtsına jáne ınfraqurylym salasyndaǵy áleýmettik mańyzy bar jobalardy iske asyrý arqyly Qazaqstan aýyldarynyń ekojúıesin damytý bolyp otyr. Qala men aýyl arasyndaǵy aıyrmashylyqty joıýǵa, tsıfrlandyrýdy damytýǵa jáne sapaly ınternetti qoljetimdi etýge tyrysamyz. Sondaı-aq kásiporyndar ashý esebinen jumyssyzdyqty azaıtqymyz keledi», - dedi joba avtorlarynyń biri Nurjan Nııazalıev.

Sondaı-aq májilismender qor qarajaty esebinen salynǵan sport keshenin aralap, jattyǵý jasap jatqan balalarmen tildesti.

Onda 100-ge jýyq bala kúres jáne boks úıirmesine qatysady.

Sonymen qatar Erlan Qoshanov pen Rýslan Berdenov qor qarajatyna salynyp jatqan kolledj qurylysyn qarap shyqty.

Bul kolledjde 500-ge jýyq bala zamanaýı jáne jaıly jaǵdaıda oqýǵa múmkindik alady.

«Túrkistanda halyq sany kóp bolǵandyqtan ınfraqurylym máseleleri bar. Memleket tarapynan bólek osyndaı bızneste júrgen azamattardyń bastamashylyq tanytyp, úlken is jasap jatqandary qýantady», - dedi Májilis tóraǵasy Erlan Qoshanov.