Májilismender ShQO-da boldy

ÓSKEMEN. QazAqparat - Májilis depýtattarynyń óńirlerdegi saparlary jalǵasýda. Halyq qalaýlylary Janat Jarasov, Ersultan Bekturǵanov jáne Taras Hıtýov Shyǵys Qazaqstan oblysyndaǵy saılaýshylarymen kezdesti, dep habarlaıdy QazAqparat.

Májilistiń baspasóz qyzmetinen málim etkendeı, aýyl turǵyndarymen kezdesýde depýtattar Memleket basshysynyń Joldaýyn talqylap, áleýmettik máselelerge erekshe kóńil aýdardy.  Olar - zeınetaqy, jalaqy, densaýlyq saqtaý, bilim berý salasyndaǵy  memlekettik qyzmet kórsetýdiń qoljetimdigi. Tutastaı alǵanda azamattardyń ál-aýqatyn jaqsartý máselelerine erekshe nazar aýdaryldy.

Odan ári depýtattar «Úlbi metallýrgııalyq zaýytynyń» ujymymen kezdesti. Atom energetıkasy, elektrondy jáne metallýrgııalyq ónerkásip jáne basqa da qajettilikterge arnalǵan ýran, berıllıı, tantal men nıobıı ónimderin óndiretin ónerkásip TMD aýmaǵyndaǵy iri kásiporyn bolyp tabylady.

Májilis depýtattary eńbek ujymymen kezdesýde turǵyn úı-kommýnaldyq sharýashylyq, mindetti áleýmettik saqtandyrý júıesin engizý, balalarǵa arnalǵan sport sektsııalary sııaqty kóptegen máselelerdi talqylady.

Óskemen qalasynda Berik Dúısenbınov Memlekettik kirister departamentiniń ujymymen, kásipkerlermen jáne  qoǵam ókilderimen kezdesti.  

Joldaýda aıtylǵan mindetterdi «Aq jol» partııasy qoldaıtynyn jetkizgen depýtat, salyq salasyndaǵy birshama suraqtarǵa jaýap berdi.

Májilis depýtattary Irına Ýnjakova jáne Pavel Kazantsev Qaraǵandy oblysynyń Osakarovka aýdanyna bardy.

Esil aýylyndaǵy jastarmen kezdesken halyq qalaýlylary memleket tarapynan aýyl sharýashylyǵyn damytýǵa úlken kóńil bólinip otyrǵany týraly aıtyp, agroónerkásip kesheniniń keleshegine nazar aýdardy.

Májilismender júzdesý barysynda kóterilgen problemalardyń barlyǵy  baqylaýǵa alynatynyn jetkizdi.