Májilismender «Qazaqfılmdi» jekeshelendirýge qarsy shyqty
«Belgili bolǵandaı, Almatynyń eń kórikti kórinisteriniń birinde ornalasqan qazaq kıno óneriniń qalaýshylarynyń biri - Sháken Aımanov atyndaǵy «Qazaqfılm» kınostýdııasynyń kesheni jekeshelendiriletin nysandardyń tizimine engizildi. Kezinde kóptegen kitaphanalar men mádenıet úıleri, kitap dúkenderi jáne taǵy basqa áleýmettik nysandar bastapqy maqsattarynan ózgertilip, orasan áleýmettik zardap shegip, ekonomıka túzelgennen keıin sol tegin ketken áleýmettik nysandardy memlekettiń qyrýar qarjysyna qaıta satyp alǵan edik. Osy jaǵdaıdy esten shyǵarmaǵanymyz abzal bolar edi», - deıdi óz saýalynda Májilis depýtaty Qýanysh Sultanov.
Ózimen birge májilismender Mamraev, Qaraǵusova, Aronova, Erman, Ótemisov atynan saýaldy qoıǵan Qýanysh Sultanov «Qazaqfılmniń» mańyzyn aıtyp berdi.
«Qazaqfılm» kesheni ultymyzdyń, ulttyq rýhanııatymyzdyń qaıtalanbas daryndy ondaǵan óner sheberleriniń tarıhymyzǵa altyn árippen jazylǵan uly esimderimen baılanysty. «Qazaqfılm» kesheniniń ózi - qasıetti shańyraq. Ony kınostýdııasyn satyp alatyn adam kınoóndirispen shuǵyldanbaıtyny beseneden belgili. Óıtkeni, ol taıaý arada kommertsııalyq paıda bere almaıdy. Áıgili «Gollıvýdtyń», tipti bizge jaqyn «Mosfılmniń» dárejesine jetýge jyldar men qyrýar qarjy kerek. Sirá, onyń turǵan jeri men ǵımarattary qyzyqtyryp tursa kerek. Al sheteldikterdiń qolyna tıse onda sóz joq, biz ulttyq kınodan, osy salada Elbasy maqalasynda aıtylǵan ulttyq kod, tegimizdi nasıhattaý múmkindiginen aıyrylamyz», - deıdi ol.
Májilis depýtaty sonymen birge bir qaýiptiń baryn alǵa tartty.
«Stýdııany satyp alǵan qojaıyn óziniń ıdeologııasyn júrgizetin bolady. Ol bizdiń jas órken talanttarymyzdy óz múddesine májbúrleıdi. Osy jaǵdaıdy eskere otyryp, «Qazaqfılm» kınostýdııasyn jekeshelendirý tiziminen shyǵarý múmkindigin qarastyrýdysuraımyz», - dedi Qýanysh Sultanov.