Májilismender aýyl kásipkerlerine nesıe sharttaryn qaıta qaraýdy surady

ASTANA. QazAqparat - QR Parlamenti Májilisiniń depýtaty Beıbit Mamraev bastaǵan bir top májilismen «Aýyl sharýashylyǵyn qarjylaı qoldaý qory» AQ-nyń nesıeleý shartaryn qaıta qaraýdy surap otyr, dep habarlaıdy QazAqparat tilshisi.

Búgingi Parlament Májilisiniń otyrysynda «Nur Otan» fraktsııasynyń músheleri depýtat Beıbit Mamraev, Shavhat Ótemisov, Káribaı Musyrman, Vasılıı Oleınık QR Aýyl sharýashylyǵy mınıstri Ómirzaq Shókeevke depýtattyq saýal joldady. 

«Jýyrda óńirlerde saılaýshylarmen kezdeskende Prezıdenttiń «Bes áleýmettik bastamasyn» halyqtyń qýana qabyl alyp otyrǵanyna kýá boldyq. Aýyl turǵyndary shaǵyn nesıe berý bastamasyna úlken úmit artyp otyr. Shókeev myrza jaqynda Parlament Májilisinde 2018-2020 jyldarǵa arnalǵan respýblıkalyq bıýdjetti talqylaý barysynda «Aýyl sharýashylyǵyn qarjylaı qoldaý qory» AQ arqyly 6 myń nesıe beretindigin málimdegen bolatyn. Alaıda qazirgi ýaqytta aýyldyqtar atalǵan qor basshylyǵy 2018 jyldyń naýryz aıyna bekitken nesıeleý sharttaryna túsinbeýshilik bildirýde», - deıdi depýat.

Beıbit Mamraevtyń aıtýynsha, «Bastaý bıznes» baǵdarlamasy boıynsha oqytylyp, jeke kásipker retinde tirkelgen aýyl azamattary atalmysh qordan ústimizdegi jyly mal sharýashylyǵymen aınalysý úshin nesıe ala almaıtyn bolyp otyr.

«Sebebi, olardyń iri jáne usaq qara mal, jylqy jáne túıe satyp alýyna ruqsat etilmeıtin bolyp shyqty. Tek qus ósirip, bal arasyn ustaý úshin, sondaı-aq aýyl sharýashylyǵy salasyna jatpaıtyn bıznesti damytý úshin nesıe berilmek. Biraq,  aýyldarǵa qansha shashtaraz jáne monsha qajet? Aýyldyq kásipkerlerdiń qanshasy osyndaı nysan ashý úshin nesıe alýy múmkin? Máseleniń osy jaǵy jiti oılastyrylmaǵan», - deıdi ol.

Depýtat óz sózinde «Aýyl sharýashylyǵyn qarjylaı qoldaý qory» AQ tek sharýa qojalyqtaryn, fermer qojalyqtaryn jáne aýyldaǵy óndiristik kooperatıvterdi ǵana keńinen nesıeleý  usynysymen kelisý qıyn ekenin bildirdi.

«Aýyl sharýashylyǵyn qarjylaı qoldaý qory» AQ-nyń 2018 jylǵy nesıeleý sharttary Elbasynyń shaǵyn nesıe berýdi kóbeıtý bastamasyn keń kólemde iske asyrýǵa kedergi keltiredi dep sanaımyz. Osyǵan oraı vıtse-premer - Aýyl sharýashylyǵy mınıstrine, «Aýyl sharýashylyǵyn qarjylaı qoldaý qory» AQ ústimizdegi jyly jeke kásipkerlerdi nesıeleý sharttaryn qaıta qarap, tıisti túzetýlerdi engizýdi suraımyz», - dedi depýtat.