Májilismen jaıylymdy jekemenshikke aınaldyrýǵa eshkimniń qaqysy joqtyǵyn aıtty

TARAZ. QazAqparat - Jambyl oblysyna arnaıy issaparmen kelgen Parlamenti Májilisiniń depýtaty Muqash Eskendirov Jýaly aýdanynda bolyp, taýly óńirde salynyp jatqan birqatar qurylys nysanyn aralap, jergilikti turǵyndardyń muń-muqtajymen tanysty, dep habarlaıdy QazAqparat tilshisi.

Halyq qalaýlysy aldymen Jetitóbe aýyldyq okrýgine qarasty Káriqorǵan aýylyndaǵy sport mektebin qaıta jańǵyrtý jumystarymen tanysty. Bul qurylys nysany buryn ámbebap dúken bolǵan. Joba quny – 111 mıllıon 330 myń teńge. Rekonstrýktsııalaý jumysyn jyl sońyna deıin aıaqtaý josparlanyp otyr.

Muqash Eskendirov merdigerlerge nysandy ýaqtyly ári sapaly atqarýmen qatar, aýlasyn abattandyrý máselesine de nazar aýdarýdyń qajettiligin aıtty.

M. Eskendirov Jetitóbe aýyldyq okrýgi turǵyndarynyń turmys jaǵdaıyn aýyl ákimi Qaınarbek Bedelbekovten surap bildi. Atalǵan aýyldyq okrýgtiń ákimi óz sózinde okrýgke qarasty 6 aýyldyń turǵyndary negizinen mal jáne egin sharýashylyǵymen aınalysatynyn aıtyp, jyl basynan munda «Aýyl amanaty» baǵdarlamasy boıynsha jumystar júrgizilip jatqanyn jetkizdi.

Pılottyq jobanyń tórt baǵyty aıasynda 146 azamat 2,5 paıyzben 778 mıllıon teńge nesıe qarajatyna qol jetkizgen. Nátıjesinde aýyl azamattary tórt túlik maldyń basyn kóbeıtýge jáne ony asyldandyrýǵa kúsh salyp jatyr.

Degenmen, mal basy artqan saıyn bul aýylda turǵyndardyń jaıylym jerge degen suranystary men narazylyǵy da kóbeıgen. Osyǵan oraı, turǵyndardyń ótinishterine sáıkes, aýyldyq okrýg ákimi Q. Bedelbekovtiń bastamasymen kezinde jeke qolǵa ótip ketken mal jaıylymyna arnalǵan jerlerdi turǵyndardyń ortaq ıeligine qaıtarý jumystary júrip jatyr.

Halyq qalaýlysy óz sózinde aýylda atqarylyp jatqan jumystardy, onyń ishinde turǵyndardyń negizgi jáne mańyzdy problemasynyń biri bolyp kelgen mal jaıylymy máselesi týraly aıtyp, Parlament qabyrǵasynda jaıylymǵa qatysty arnaıy zań qabyldanyp, jaıylymdardy memleket menshigine qaıtarý arqyly aýyl turǵyndarynyń ortaq paıdalanýyna aınaldyrýǵa bolatynyn aıtty. Jaıylymdy eshkimniń jeke menshigine aınaldyrýǵa qaqysy joq ekenin jetkizdi.

Munan soń Muqash Eskendirov respýblıkalyq mándegi «B.Momyshuly-Qoshqarata» tas jolynyń 35-40 shaqyrym aýmaǵyndaǵy jóndeý jumystarymen tanysyp, qalǵan bóliginiń jóndeý jumystaryn jalǵastyrý úshin respýblıkalyq bıýdjetten qarajat bóldirýge yqpal etetinin aıtty.

Májilis depýtaty óńirge jasaǵan jumys saparynyń barysynda sondaı-aq, aýdan ortalyǵynan shalǵaıda ornalasqan Qoshqarata aýyldyq okrýgine de arnaıy baryp, turǵyndardyń turmysymen tanysty. Okrýgke qarasty Qyztoǵan aýylyn aýyz sýmen qamtamasyz etý úshin qoıylyp jatqan keshendi blok modýlin, sondaı-aq, Qoshqarata aýylyna gaz júrgizý jumysyn da baryp kórdi.

Jumys saparynyń sońynda depýtat aýdan ortalyǵy B.Momyshuly aýylynda salynyp jatqan 18 páterli kópqabatty turǵyn úıdiń qurylysymen tanysyp, aýyldyq okrýg ákimderimen kezdesip, pikir almasty.

«Sizderdiń eń basty mindetterińiz – jergilikti halyqqa adal qyzmet etý. Halyqqa jaqyn júrip, turǵyndarmen tyǵyz baılanysta bolý arqyly óńirde qordalanǵan máselelerdi ońaı sheshýge bolady. Aýyldy órkendetýge jáne damytýǵa qatysty bastamalardy eń birinshiden aýyl ákimderi kóterýleri tıis.

Barlyǵymyz halyqtyń arasynan shyqtyq, endi halyqqa, aýyldyń damýyna eńbegimizdi sińireıik. Sondyqtan aýyldy órkendetý jolynda biz sizderge kómekshi bolýǵa daıynbyz. Aýyl – barlyǵymyzǵa amanat. Aýyldy birge órkendeteıik», - dedi ol kezdesýde.

Buǵan deıin Senat depýtaty Jambyl oblysyndaǵy birneshe kúrdeli qurylysqa qarjy bólinýine yqpal etetinin jazǵan bolatynbyz.