Májilis zymyran bólikteri qulaıtyn jerge qatysty qujatpen jumys jasaý merzimin uzartty

ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy «Baıqońyr» ǵarysh aılaǵynan ushyrý kezinde tasymaldaǵysh zymyrandardan bólinetin bólikterdiń qulaý aýdany retinde Qazaqstan Respýblıkasynyń aýmaǵyndaǵy jer ýchaskesin berý jáne paıdalaný sharttary týraly kelisimdi ratıfıkatsııalaý týraly» zań jobasymen jumystyń merzimi uzartyldy, dep habarlaıdy QazAqparat.

«Atalǵan kelisimmen «Soıýz» úlgisindegi zymyran tysymaldaǵyshtan bólinetin bólikterdiń qulaý aýdany retinde jer ýchaskesin Reseı Federatsııasynyń paıdalanýy úshin Qazaqstan Respýblıkasy tarapynyń usynýy turǵysynda uıymdastyrýshylyq-quqyqtyq negizder belgilenedi. Atalǵan zań jobasyn qarastyrý merzimi 2017 jyldyń 31 jeltoqsanyna deıin aıqyndalǵan edi. Bıylǵy 23 qarashada Qorǵanys jáne aeroǵarysh ónerkásibi mınıstrliginen hat kelip, onda zań jobasy turǵysynda qorytyndyny daıarlaý merzimin 2019 jylǵa deıin uzartý ótinimi qamtyldy», - dedi Májilistiń Halyqaralyq ister, qorǵanys jáne qaýipsizdik komıtetiniń múshesi Janat Jarasov.

Bul atalǵan qujatty qazirgi kezde ázirlenip jatqan «1995 jylǵy 23 jeltoqsandaǵy Qazaqstan Respýblıkasy men Reseı Federatsııasy arasyndaǵy Baıqońyr qalasynyń mártebesi jáne ondaǵy atqarýshy organdardy qurýdyń tártibi men olardyń mártebesi týraly kelisimge ózgerister engizý týraly hattamany ratıfıkatsııalaý týraly» zań jobasymen bir mezgilde qarastyrý qajettigine baılanysty bolyp otyr.

Jalpy otyrys barysynda palata depýtattary zań jobasy boıynsha qortyndyny ázirleý merzimin 2019 jyldyń 31 jeltoqsanyna deıin uzartýdy qoldady.