Májilis jerdi paıdalanýǵa baqylaýdy kúsheıtetin zań jobasyn talqylaıdy

NUR-SULTAN. QazAqparat – Parlament Májilisiniń depýtattary «Qazaqstan Respýblıkasynyń keıbir zańnamalyq aktilerine jer qatynastaryn damytý máseleleri boıynsha ózgerister men tolyqtyrýlar engizý týraly» zań jobasyn talqylaıtyn bolady, dep habarlaıdy QazAqparat tilshisi.

«Atalǵan zań jobasy Memleket basshysynyń tapsyrmasyn oryndaý maqsatynda jáne jer qatynastary salasyndaǵy negizgi máselelerdi talqylaý ári olar boıynsha usynymdar ázirleý úshin arnaıy qurylǵan Jer reformasy jónindegi komıssııa qyzmetiniń qorytyndysy boıynsha ázirlendi. Atap aıtqanda, zań jobasymen otandyq jer paıdalanýshylar úshin aýyl sharýashylyǵy maqsatyndaǵy jerlerdi jalǵa berý ınstıtýtyn jetildirý kózdelgen. Sonymen qatar, qazaqstandyqtarǵa aýyl sharýashylyǵy jerlerin jekemenshikke berý jónindegi Jer kodeksi normalarynyń qoldanylýyn bes jylǵa keıinge qaldyrý usynyldy», - dedi Májilistiń Agrarlyq máseleler komıtetiniń tóraǵasy Erlan Barlybaev palatanyń jalpy otyrysynda.

Onyń aıtýynsha, zań jobasy aıasynda jerdi paıdalanýǵa memlekettik baqylaý kúsheıtildi.

«Jaıylymdyq jerlerdiń aýmaqtary anyqtaldy jáne ashyq jer kadastry kózdelgen. Agrarlyq máseleler komıteti atalǵan zań jobasy boıynsha qorytyndy ázirleýge daıyn», - dedi depýtat.

Eske sala keteıik, bıyl sáýir aıynyń sońynda Jer reformasy jónindegi komıssııanyń otyrysynda jer ıelgine qatysty normalarǵa belgilengen moratorıı merzimin 5 jylǵa uzartý týraly sheshim qabyldandy.