Májilis jer zańnamasyna jańa tolyqtyrýlardy birinshi oqylymda maquldady
2016 jyly Memleket basshysynyń Jarlyǵymen Jer kodeksiniń jekelegen baptarynyń qoldanysyna moratorıı engizilgeni belgili. Bul moratorıı 2021 jyly 31 jeltoqsanda aıaqtalady. Sheteldikter baılanysty moratorıı normalaryna keletin bolsaq, Memleket basshysy túpkilikti saıası sheshim qabyldady. Atap aıtqanda, 2021 jyly 13 mamyrda aýyl sharýashylyǵy jerlerin sheteldikterge, sheteldik zańdy tulǵalarǵa berýge jáne satýǵa tolyq tyıym salýdy kózdeıtin Qazaqstan Respýblıkasynyń tıisti Zańy qabyldandy.
«Qazaqstandyqtarǵa qatysty moratorıı normalary boıynsha, sondaı-aq jer zańnamasyn jetildirý maqsatynda Memleket basshysy Ulttyq qoǵamdyq senim keńesiniń besinshi otyrysynda Jer reformasy boıynsha komıssııa qurýdy tapsyrdy. Barlyǵy Jer komıssııasynyń quramyna 80 adam kirdi, olardyń 75 paıyzy azamattyq qoǵam ókilderi jáne táýelsiz sarapshylar boldy», - dedi QR Aýyl sharýashylyǵy birinshi vıtse-mınıstri Aıdarbek Saparov.
Jer reformasy jónindegi komıssııa bıylǵy 25 naýryzda jumysqa kirisip, 24 sáýirde jumysyn aıaqtady. Komıssııanyń 5 otyrysy ótkizilip, onda 120-dan astam usynys kóterilip, jer zańnamasyn jetildirýga baılanysty birqatar júıeli usynymdar ázirlendi. Jer reformasy jónindegi komıssııanyń usynystaryn iske asyrý maqsatynda «Qazaqstan Respýblıkasynyń keıbir zańnamalyq aktilerine jer qatynastaryn damytý máseleleri boıynsha ózgerister men tolyqtyrýlar engizý týraly» zań jobasy daıyndaldy.
Zań jobasynyń negizgi ózgeristeri men tolyqtyrýlary:
- qazaqstandyqtarǵa jáne qazaqstandyq zańdy tulǵalarǵa aýyl sharýashylyǵy maqsatyndaǵy jerlerdi 49 jylǵa deıingi merzimge jalǵa berý;
- kelesi, jalǵa alý merzimi aıaqtalǵan kezde ony jańa merzimge uzartý quqyǵyn berý;
- memleketten satyp almaı, jer paıdalanýshylar arasynda aýyl sharýashylyǵy maqsatyndaǵy jerge jaldaý quqyǵyn ıelikten shyǵarý. Bul rette, olardy paıdalaný merzimi keminde 5 jyl, sondaı-aq jer qatynastary organdaryn habarlaý mindetti shart bolyp sanalady;
- Jer resýrstaryn basqarý komıtetine jerdi paıdalaný men qorǵaýdy memlekettik baqylaý fýnktsııalaryn ákimdikterden qaıtarý;
- jer úlesteri esebinen quralǵan aýyl sharýashylyǵy maqsatyndaǵy jer ýchaskesin kepilge salý kezinde úles ıeleriniń kelisimi bolǵanda ruqsat berý;
- aýyl sharýashylyǵy jerleriniń nysanaly maqsatyn «baǵbandyq» jáne «saıajaı qurylysyna» ózgertýge tyıym salý;
- jer berý komıssııasynyń hattamalyq sheshimine shaǵymdaný merzimin belgileý boıynsha normalardy naqtylaý;
- halyqtyń muqtajyn qanaǵattandyrý maqsatynda, jergilikti jaǵdaılardy eskere otyryp, jaıylymdardy basqarý jónindegi josparlarda, qajetti jaıylym alqabynyń shekarasyn aıqyndaý;
- berilgen aýyl sharýashylyǵy maqsatyndaǵy jer ýchaskeleri týraly málimetterdi memlekettik jer kadastrynyń ınternet - resýrsynda ashyq túrde ornalastyrý;
- aýyl sharýashylyǵy maqsatyndaǵy jerlerdi jeke menshikke berýge moratorııdiń qoldanylý merzimin 2026 jylǵy 31 jeltoqsanǵa deıin uzartý.
«Ázirlengen zań jobasyn qabyldaý nátıjesinde mynadaı oń áleýmettik-ekonomıkalyq saldar kútiledi: jalǵa alynǵan aýyl sharýashylyǵy maqsatyndaǵy jerlerdi ekonomıkalyq aınalymǵa tartý, jergilikti halyqtyń jaıylymdyq jerlerge qajettiligin qanaǵattandyrý, aýyl sharýashylyǵy jerleriniń nysanaly maqsatyn ózgertýge qoıylatyn talaptardy jáne jerdi paıdalaný men qorǵaýǵa baqylaýdy kúsheıtý, sondaı-aq aýyl sharýashylyǵy maqsatyndaǵy jer ýchaskeleri boıynsha aqparattyń ashyqtyǵy. Árıne, jer zańnamasyna talqylanǵan túzetýlerdi qabyldaý agroónerkásiptik keshendi turaqty damytýdyń biri bolyp otyr. Óıtkeni jer máseleleri - aýyl sharýashylyǵy ekonomıkasyn damytýdyń negizgi faktorlary. Sonymen, el Prezıdenti Úkimet aldyna birqatar naqty ári mańyzdy mindetter qoıdy, olardy biz agroónerkásiptik keshendi damytýdyń 10 jylǵa arnalǵan uzaq merzimdi kontseptsııasyn jáne agroónerkásiptik keshendi damytý jónindegi 2021-2025 jyldarǵa arnalǵan ulttyq jobany qabyldaýmen iske asyrýdy josparlap otyrmyz», - dedi Aıdarbek Saparov.