Májilis jastardy baspanamen qamtýdyń jańa tetikterin maquldady
Memlekettik jastar saıasatynyń negizgi baǵyttaryna jumys isteıtin jastar úshin qoljetimdi baspana júıesin damytýdy engizý qarastyrylǵan. Sondaı-aq, memlekettik jastar saıasaty jónindegi ýákiletti organdy satyp alý quqynsyz jalǵa beriletin turǵyn úıdi berý qaǵıdalaryn bekitý quzyretimen qamtamasyz etý eskerilgen.
«Bul túzetýler Elbasynyń tapsyramasy boıynsha jumys isteıtin jastardy jalǵa beriletin turǵyn úımen qamatamasyz etý úshin ázirlengen tetikti júzege asyrýǵa múmkindik beredi. «Nurly jer» baǵdarlamasynyń aıasynda 2019-2025 jyldary Nur-Sultan, Almaty jáne Shymkent qalalarynda jumys isteıtin jastar úshin jyl saıyn keminde 1 myń jalǵa beriletin turǵyn úı salý josparlanýda. Jumys isteıtin jastar úshin bul jaqsy múmkindik bolyp sanalady», - dedi Májilis depýtaty Shavhat Ótemisov qujatty tanystyrý barysynda.
Qaralyp otyrǵan zań jobasynyń qabyldanýy kópbalaly otbasylardyń jáne jumys isteıtin jastardyń baspana máselesin jedel sheshý úshin zańnamalyq negizdi qalyptastyrady.
Aıta keteıik, jalpy otyrysta palata depýtattary «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasyn maquldady.
Onyń aıasynda «Altyn alqa», «Kúmis alqa» alǵandar nemese buryn «Batyr ana», sondaı-aq birinshi jáne ekinshi dárejeli «Ana dańqy» ataǵyn alǵan kópbalaly analar men kópbalaly otbasylar sanaty úshin turǵyn úı alýǵa jeke kezek engizý qarastyrylǵan.
Esterińizge sala keteıik, Jastar jylynyń ashylýyna arnalǵan saltanatty jıynda Elbasy Nursultan Nazarbaev elordada, Almaty jáne Shymkent qalalarynda jastar úshin jylyna 1 myń páter salynatynyn aıtqan bolatyn.
Sonymen qatar, bıyl «mıllıon turǵyny bar qalalarda jumys isteıtin jastar úshin 1 myń páter qurylysy bastalatyny aıtylǵan edi.