Májilis volonterlik qyzmet pen qaıyrymdylyq týraly zań jobasyn maquldady

NUR-SULTAN. QazAqparat – Májiliste «QR keıbir zańnamalyq aktilerge volonterlik qyzmet, qaıyrymdylyq, memlekettik áleýmettik tapsyrys jáne úkimettik emes uıymdarǵa arnalǵan granttar máseleleri boıynsha ózgerister men tolyqtyrýlar engizý týraly» Zań jobasy ekinshi oqylymda maquldandy, dep habarlaıdy QazAqparat tilshisi.

Birinshi oqylymda zań jobasy bıylǵy aqpan aıynda maquldanǵan edi.

«Zań jobasy memlekettik grant saıasatyn, qaıyrymdylyq jáne volonterlik qyzmetti júzege asyrý salalaryndaǵy zańnamany jetildirýge, sondaı-aq memlekettik organdar men úkimettik emes uıymdardyń «strategııalyq áriptestik» túrindegi ózara is-qımylynyń jańa tetigin engizýge baǵyttalǵan. Zań jobasymen jumys barysynda depýtattar «volonterlik qyzmet», «volonterlik qyzmet salasyndaǵy ýákiletti organ», «qaıyrymdylyq volonteri» uǵymdaryn naqtylady, qaıyrymdylyq baǵdarlamasyn ázirleý, bekitý jáne oryndaý jónindegi normalar qaıta qaraldy, halyq arasynda aqparattyq-túsindirý jumystaryn júrgizýge qatysý quqyǵy keńeıtildi», - dedi depýtat, Áleýmettik-mádenı damý komıtetiniń múshesi Vera Kım Májilistiń jalpy otyrysynda.

Sonymen birge, azamattyq qoǵamdy tarta otyryp, memlekettik granttardyń tıimdiligine baǵalaý júrgizý jónindegi normalar kúsheıtilgen. Aqparat jáne qoǵamdyq damý mınıstrliginiń quzyretine Volonterlik qyzmetti esepke alý tizilimin júrgizý boıynsha fýnktsııalar engizilgen.

Depýtattar volonterlerdi «QR-daǵy memlekettik nagradalar týraly» zańda kózdelgen tártippen nagradalarmen marapattaýdy usynǵan.

«Halyqty dári-dármekpen qamtamasyz etý jáne medıtsınalyq kómekpen qamtý maqsatynda Densaýlyq saqtaý mınıstrliginiń strategııalyq mańyzdy dárilik zattar men medıtsınalyq buıymdardyń tizbesin jáne olardy memlekettik tirkeý tártibin aıqyndaý jónindegi quzyreti belgilendi. Derbes tóleýshilerdiń MÁMS aıasynda medıtsınalyq kómek alý úshin áleýmettik medıtsınalyq saqtandyrý qoryna mindetti jarnalardy tóleýdiń balamaly tetigi engizildi. BAQ qyzmetkerleriniń áleýmettik tólemder alýy úshin kiristerin esepke alýǵa qatysty jáne mádenıet salasyndaǵy memlekettik stıpendııany qurýǵa qatysty «Mádenıet týraly» zańǵa ózgerister engizildi», - dedi V. Kım.