Májilis Uly Otan soǵysynyń bir top ardagerlerine qurmet kórsetedi

ALMATY. Sáýirdiń 28-i. QazAqparat - Uly Jeńistiń 65 jyldyǵy qarsańynda Dınar Nóketaeva bastaǵan Májilis depýtattary sáýirdiń 30-y, juma kúni, Almaty qalasynda Uly Otan soǵysynyń bir top ardagerlerin saltanatty jaǵdaıda quttyqtaıdy,

dep habarlaıdy QazAqparat.

Qadirli meımandarǵa gúl shoqtary men parlamenttik syılyqtar berilýimen birge, Májilistiń Tóraǵasy, «Nur Otan» HDP Fraktsııasynyń jetekshisi Oral Muhamedjanovtyń quttyqtaý lebizi jetkiziledi.

Beıbit ómirde kóptegen ardagerler eńbek jolyn elimizdiń joǵarǵy ókiletti organymen tyǵyz baılanystyrǵan jáne qurmetti eńbek demalysyna shyqqan.

Aıta ketý kerek, qurmetti qonaqtardyń ishinde Іzgilik Dabaev ta bar. Ol 1922 jyly Aqtóbe oblysy, Shalqar aýdanynda dúnıege kelgen. 1941 jyly áskerge alynǵan. Máskeý túbindegi bolǵan qandy shaıqastarǵa kirisken Іzgilik Dabaev Berlınge deıingi qandy shaıqastar jolyn basyp ótken. Dneprdi jaýdan bosatqany úshin «Erligi úshin» medalimen marapattalǵan. Áıgili Kýrsk doǵasyndaǵy keskilesken urystaǵy erligi úshin Uly Otan soǵysy ordenine ıe bolǵan. 1945 jyly jeltoqsan aıynda elge oralǵan.

Sonymen qatar 1926 jyly Máskeý qalasynda týǵan Evgenıı Safronov ta 1943 jyly áskerge shaqyrylyp, atty ásker quramynda Oder, Neman, Vısla ózenderin jaýdan azat etýde erlik kórsetken. Sonymen qatar Shyǵys Prýssııany, Pomeranııany jáne Polshany jaýdan bosatyp, 1945 jyly jeńisti mamyr aıynda Elba ózeninde odaqtastardyń áskerimen birigý sharasyna qatysqan. Soǵystyń surapyl jyldaryn bastan keshken ardagerdiń keýdesinde erliktiń kýásindeı «Qyzyl Juldyz» jáne Dańq ordeni jarqyrap tur.