Májilis ulttyq brendteýdi damytýǵa qatysty qujatty birinshi oqylymda maquldady

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine zııatkerlik menshik calasyndaǵy zańnamany jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasyna Parlament Májilisiniń depýtattary 2020 jyly halyqaralyq tájirıbelerdi taldaý negizinde bastamashylyq jasady. Ol 2018 jyly qabyldanǵan ulttyq zańnamalyq normalardy damytýǵa baǵyttalǵan, sondaı-aq Ekonomıkalyq yntymaqtastyq jáne damý uıymynyń standarttaryna kóshýdi qamtamasyz etedi.

«Májilistiń tapsyrmasy boıynsha Ádilet mınıstrligi Reed Smith kompanııasynyń zań konsýltanttaryn tarta otyryp, zańnama men quqyq qoldaný praktıkasyna taldaý júrgizdi. Taldaý qorytyndysy boıynsha Ádilet mınıstrligimen birlese otyryp, osy salany odan ári damytý boıynsha usynystar ázirlendi. Jumystyń nátıjeleri depýtattyq bastamaǵa negiz boldy», - dep túsindirdi Májilisiniń depýtaty Gúlnar Bıjanova.

Zań jobasynda mynadaı túzetýler usynylǵan:

- avtorlardyń zańdy alymdar men syıaqylar alý quqyqtaryn qorǵaý maqsatynda ujymdyq uıymdar qyzmetiniń ashyqtyǵyna qoıylatyn talaptar kúsheıtiledi;

- ulttyq brendteýdi damytý jáne ótkizý naryǵyn keńeıtý maqsatynda «geografııalyq nusqaý» degen jańa obekt engiziledi;

- tirkelmegen ónerkásiptik úlgilerdi qorǵaý úshin «qysqa merzimdi qorǵaý» rejımi engiziledi;

- taraptardyń «oppozıtsııalyq» júıeni qoldaný múmkindikteri keńeıtiledi. Bul jańalyq ótinim satysynyń ózinde tirkeýge qarsylyq bildirýge ruqsat beredi;

- patenttik senim bildirilgen ókilderdiń qyzmetin retteýge qoıylatyn talaptar naqtylanady. Bul quqyq ıelenýshilerdiń zańdy quqyqtary men múddelerin qorǵaýdyń sapasyn qamtamasyz etýge múmkindik beredi.

«Birqatar túzetýler ulttyq zańnamany zııatkerlik menshik salasyndaǵy halyqaralyq aktilermen úndestirý qajettiligine baılanysty. Osy zań jobasynyń mańyzdylyǵyn, onyń eldegi zııatkerlik menshik salasyn damytý, quqyq ıelenýshilerdiń zańdy quqyqtary men múddelerin qorǵaý úshin saldaryn eskere otyryp, Ulttyq zııatkerlik menshik ınstıtýtyna baryp, Zańnama jáne sot-quqyqtyq reforma komıtetiniń keńeıtilgen otyrysy ótkizildi. Máselelerdiń keń aýqymyn talqylaýǵa kórnekti halyqaralyq jáne otandyq sarapshylar, Eýrazııalyq patenttik vedomstvonyń basshysy, sýdıalar, Sot tóreligi akademııasynyń basshysy, ǵylym, shyǵarmashylyq ıntellıgentsııa, avtorlyq qoǵamdastyqtar men múddeli memlekettik organdardyń ókilderi tartyldy. Zań jobasyn qabyldaý zııatkerlik menshikke arnalǵan quqyqtardy qorǵaýdy odan ári kúsheıtýge jáne zııatkerlik menshik salasyndaǵy daýlardy obektıvti sheshý úshin jaǵdaılar jasaýǵa yqpal etetinine senimdimiz», - dedi depýtat.