Májilis UQShU aıasynda materıaldyq-tehnıkalyq qamtamasyz etý jónindegi zańdy qabyldady

ASTANA. QazAqparat – Búgin Májilistiń jalpy otyrysynda «Ujymdyq qaýipsizdik týraly shart uıymynyń áskerlerin (Ujymdyq kúshterin) birlesken materıaldyq-tehnıkalyq jáne medıtsınalyq qamtamasyz etý týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Kelisimge 2021 jylǵy 16 qyrkúıekte Dýshanbe qalasynda Ujymdyq keńes otyrysynda qol qoıyldy.

«Kelisim qoıylǵan mindetti birlesip oryndaý kezinde áskerdi materıaldyq-tehnıkalyq, medıtsınalyq qamtamasyz etý, jedel jáne jaýyngerlik daıarlyq is-sharasy barysynda memleketterdiń ózara is-qımylyn retteıdi. Qujat boıynsha taraptar kelisilgen áskerı-tehnıkalyq saıasatty júrgizedi. Bul saıasat áskerdi qarý-jaraq pen tehnıkanyń jańa úlgisimen, materıaldyq quralmen qamtamasyz etýge baǵyttalǵan», - dedi Qorǵanys mınıstriniń orynbasary Sultan Qamaletdınov.

Onyń aıtýynsha, áskerdi materıaldyq-tehnıkalyq, medıtsınalyq qamtamasyz etýdi osy toptyń qolbasshylyǵy uıymdastyrady. Ol árbir tarap esebinen derbes júrgiziledi.

«Jiberýshi tarap úshin áskerdi qamtamasyz etý qıynǵa tússe, bul is-sharalar qabyldaýshy nemese basqa taraptyń resýrsy esebinen ýaǵdalastyq negizinde iske asyrylýy múmkin», - dedi mınıstrdiń orynbasary.

Budan buryn habarlanǵandaı, búgin Májilistiń jalpy otyrysynda «Ujymdyq qaýipsizdik týraly shart uıymyna múshe memleketterdiń aýmaǵynda ujymdyq qaýipsizdik júıesiniń kúshteri men quraldary quralymdarynyń ýaqytsha bolýyna baılanysty ister boıynsha quqyqtyq kómek kórsetý jáne ıýrısdıktsııa máseleleri jónindegi kelisimdi ratıfıkatsııalaý týraly» Zańy qabyldandy.