Májilis UQShU aıasynda quqyqtyq kómek kórsetýge qatysty qujatty qabyldady

ASTANA. QazAqparat – Búgin Májilistiń jalpy otyrysynda «Ujymdyq qaýipsizdik týraly shart uıymyna múshe memleketterdiń aýmaǵynda ujymdyq qaýipsizdik júıesiniń kúshteri men quraldary quralymdarynyń ýaqytsha bolýyna baılanysty ister boıynsha quqyqtyq kómek kórsetý jáne ıýrısdıktsııa máseleleri jónindegi kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Kelisimge 2021 jylǵy 16 qyrkúıekte Dýshanbe qalasynda Ujymdyq keńes otyrysynda qol qoıyldy.

«Kelisimde ujymdyq qaýipsizdik júıesiniń kúshteri quramyna kiretin adamdarǵa qatysty qylmystyq ári ákimshilik is boıynsha memleketterdiń quzyretti organdarynyń yntymaqtastyǵy tetigi aıqyndalǵan. Quzyretti organǵa áskerı basqarý organy, áskerı bólim komandıri, sot, prokýratýra, aldyn ala tergeý, ishki ister, qaýipsizdik organy men arnaıy qyzmet jatady», - dedi Qorǵanys mınıstriniń orynbasary Sultan Qamaletdınov.

Onyń aıtýynsha, qujatta atalǵan júıe kúshteri quramyna kiretin adamdarǵa qatysty taraptar ıýrısdıktsııasy aıqyndalǵan. Sonymen qatar, jiberýshi eldiń adamy kelgen ózge aýmaqta qylmys jasaǵan kezde, ony tergeý tártibi bekitilgen. Bul rette protsess barysyndaǵy shyǵyndy ár tarap ózi kóteredi.

«Protsess kezinde taraptardyń egemendigi men ulttyq qaýipsizdigi eskeriledi. Sonymen qatar, Kelisimde osy quqyqtyq kómek memlekettiń egemendigine nemese qaýipsizdigine nuqsan keltirse, ulttyq zańnamasyna qaıshy kelse, odan bas tartylady dep bekitilgen. Kelisimdi ratıfıkatsııalaý Qazaqstan múddesine jáne Uıym aıasyndaǵy halyqaralyq mindettemege sáıkes keledi», - dedi mınıstrdiń orynbasary.