Májilis Túrki akademııasyn ornalastyrýdyń sharttaryna qatysty zań jobasyn maquldady

NUR-SULTAN. QazAqparat – Búgin Májilistiń jalpy otyrysynda «QR Úkimeti men Túrki akademııasy arasyndaǵy Túrki akademııasyn ornalastyrýdyń sharttary men tártibi týraly kelisimdi ratıfıkatsııalaý týraly» Qazaqstan Respýblıkasy Zańynyń jobasy maquldandy, dep habarlaıdy QazAqparat tilshisi.

«Akademııanyń basty maqsaty – túrki tilderin, ádebıetin jáne mádenıetin saqtaýǵa, damytýǵa jáne tanymal etýge baǵyttalǵan túrkologııa salasyndaǵy zertteýlerdi júrgizý. Qazirgi tańda akademııaǵa múshelikke Qazaqstannan basqa Qyrǵyzstan, Ázerbaıjan jáne Túrkııa elderi enip otyr. Al Vengrııa búgingi kúni baqylaýshy mirtebesine ıe. Akademııanyń shtab-páteri Nur-Sultan qalasynda ornalasqanyna baılanysty kelisimniń maqsaty - elimizge jumys isteý kezeńindegi Túrki akademııasynyń mártebesin, onyń artyqshylyqtary men ımmýnıtetterin anyqtaý», - dedi zań jobasy týraly baıandaǵan QR Bilim jáne ǵylym mınıstri Ashat Aımaǵambetov.

Mınıstrdiń dereginshe, akademııada 17 adam jumys isteıdi. Onyń ishinde ekeýi shetel azamattary.

«Kelisim kúshine engennen keıin akademııanyń jergilikti jáne sheteldik qyzmetkerleri Syrtqy ister mınıstrliginde akkredıtteýden ótýi tıis bolady. Akademııa ǵylymı-zertteý jumystarymen, kitaptar men jýrnaldar shyǵarýmen aınalysady, túrki elderiniń ataqty ǵalymdaryna halyqaralyq forýmdar men konferentsııalar ótkizýde, túrkologııa boıynsha ǵylymı jumystar júrgizýde búgingi kúni úlken belsendilik tanytyp keledi. Túrkitildes memleketter uıymyna qatysýshy eldermen yntymaqtastyqty nyǵaıtýdyń jáne QR-dyń túrki álemindegi rólin arttyrýdyń mańyzdylyǵyn nazarǵa ala otyryp, atalǵan zań jobasyn qarastyrýlaryńyzdy suraımyn», - dedi ol.

Zań jobasyn talqylaý barysynda depýtattar qujatty maquldap, Senat qaraýyna jiberý týraly sheshim qabyldady.