Májilis týrıstik qyzmet salasyndaǵy qujatty maquldady

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine týrıstik qyzmet máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.

Zań jobasy týrıstik qyzmet salasyndaǵy zańnamany jetildirý maqsatynda ázirlendi.

Atalǵan qujat 2020 jylǵy 18 qarashada Májiliste birinshi oqylymda maquldandy.

Jumys tobynyń zań jobasymen jumysy barysynda depýtattar:

- sheteldik týrısti tartqany úshin týroperatorlardyń shyǵyndaryn sýbsıdııalaý, týrıstik qyzmet obektilerin salý, rekonstrýktsııalaý, jol boıyndaǵy servıs obektilerin salý kezindegi shyǵyndardyń bir bóligin óteý boıynsha týrıstik salany memlekettik qoldaý sharalaryn aıqyndaýǵa jáne damytýdy yntalandyrýǵa;

- ishki jáne kelý týrızmi salasyndaǵy týroperatorlyq qyzmet lıtsenzııasyn habarlama tártibine aýystyrýdy alyp tastaýǵa jáne lıtsenzııalaý qyzmetiniń osy túrin saqtaýǵa;

- basym týrıstik aýmaqty basqarý úshin basqarýshy kompanııa qurý jónindegi normany alyp tastaýǵa;

- týrıstik jarnany respýblıkalyq bıýdjetten respýblıkalyq mańyzy bar qalalardyń, astananyń, aýdandardyń jáne oblystyq mańyzy bar qalalardyń bıýdjetterine aýystyrýǵa jáne máslıhattarǵa týrıstik jarnanyń mólsherlemelerin bekitý jóninde quzyretti berýge baǵyttalǵan túzetýler engizdi.

Budan basqa, depýtattar Qazaqstan Respýblıkasynyń qoldanystaǵy zańnamasyna jáne zań tehnıkasynyń talaptaryna sáıkes keltirý boıynsha, sondaı-aq zań jobasynyń jekelegen normalaryn naqtylaıtyn jáne mazmunyn jaqsartatyn túzetýler engizdi.

Jumys tobyna Parlament Májilisiniń komıtetteri men depýtattarynan 355 túzetý kelip tústi, olar múddeli mınıstrlikter men vedomstvolar, qoǵamdyq birlestikter men saraptama uıymdary ókilderiniń qatysýymen jumys tobynyń 32 otyrysynda, komıtettiń keńeıtilgen otyrystarynda qaraldy.