Májilis Tótenshe jaǵdaılar jáne dúleı zilzalalardyń qaýip-qaterin azaıtý ortalyǵyna qatysty zań qabyldady
«Kelisim 2014 jylǵy 14 sáýirdegi № 191-V Qazaqstan Respýblıkasynyń Zańymen ratıfıkatsııalanǵan 2013 jylǵy 17 mamyrdaǵy Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Tótenshe jaǵdaılar jáne dúleı zilzalalardyń qaýip-qaterin azaıtý jónindegi ortalyqty qurý týraly kelisimniń 6-babyn júzege asyrý úshin jasaldy. Kórsetilgen Kelisimniń 6-babynda Ortalyqtyń bolý sharttary Qazaqstan Respýblıkasynyń Úkimeti men Ortalyq arasyndaǵy jeke halyqaralyq shartpen aıqyndalatyny belgilenedi. Qazaqstan Respýblıkasynyń aýmaǵynda Tótenshe jaǵdaılar jáne dúleı zilzalalardyń qaýip-qaterin azaıtý jónindegi ortalyq halyqaralyq uıym retinde óziniń maqsattary men mindetterin oryndaý úshin qajetti jaǵdaılardy qamtamasyz etý Kelisimde kózdeledi», - dedi zań jobasyn tanystyrǵan Tótenshe jaǵdaılar mınıstri ıÝrıı Ilın.
Mınıstrdiń atap ótýinshe, 2016 jyldan bastap Ortalyq óńir memleketteriniń tótenshe vedomstvolarymen, halyqaralyq jáne úkimettik emes uıymdarmen birlesip, zilzalalar men tótenshe jaǵdaılardyń qaýpin azaıtý salasynda, onyń ishinde atqarýshy agenttik retinde 30-dan astam baǵdarlamalar men jobalardy iske asyrdy jáne iske asyrýdy jalǵastyrýda. 11 joba Qazaqstan Respýblıkasynyń damýyna tikeleı úles qosady.
«Ortalyq alańynda Qazaqstannyń, shet memleketterdiń, BUU jáne basqa da halyqaralyq uıymdardyń tájirıbeli sarapshylaryn tarta otyryp, 163 halyqaralyq is-sharalar, semınarlar men trenıngter ótkizildi. Qazaqstan Respýblıkasy memlekettik organdarynyń bir jarym myńnan astam ókili zilzalalar qaýpin azaıtý men tótenshe jaǵdaılar salasynda álemdik qoǵamdastyq ázirlegen úzdik tájirıbelerge oqytyldy. Búgingi kúni Ortalyq seriktestermen birlesip, zilzalalar qaýpin azaıtý men tótenshe jaǵdaılar salasynda 60-tan astam zertteý, taldamalyq, ádistemelik ázirlemeler, oqý-ádistemelik, aqparattyq jáne eseptik materıaldardy ázirlep, Ortalyqtyń saıtynda ornalastyrdy. Yntymaqtastyq úshin quqyqtyq baza qurý maqsatynda Ortalyq halyqaralyq, úkimettik emes, ǵylymı, bilim berý jáne ózge de uıymdarmen 31 memorandýmǵa qol qoıdy», - dedi ol.