Májilis tóraǵasy Oral Muhamedjanov ardagerlerdi Uly Jeńistiń 65 jyldyǵy merekesimen quttyqtady
dep habarlaıy QazAqparat.
«Nur Otan» halyqtyq demokratııalyq partııasynyń parlamenttik fraktsııasy Uly Otan soǵysynyń ardagerlerin Májiliske shaqyryp, merekelik shara uıymdastyrǵan bolatyn. Onyń barysynda ardagerler Májilis ǵımaratyn aralap, spıkermen estelik sýretke tústi. Sondaı-aq ardagerlerge arnalyp dastarhan jaıylyp, olar Astana qalalyq fılarmonııasynyń ókilderi daıyndaǵan arnaıy merekelik baǵdarlamany tamashalady. Onda Uly Otan syǵysy jyldaryndaǵy oqıǵalar boıynsha kórinis qoıylyp, soǵys jyldaryndaǵy ánder shyrqaldy.
Ardagerlerdi Májilis tóraǵasy Oral Muhamedjanov quttyqtady.
«Biz Uly Jeńistiń 65 jyldyǵy qarsańynda sizderdi Parlamentke shaqyryp, ózimizdiń atymyzdan, búgingi urpaqtyń atynan sizderge degen qurmetimizdi bildirgimiz keldi. Búgingi urpaq sizderdiń jankeshtilikti erlikterińizdiń arqasynda kelgen beıbit te tynysh zamanda ómir súrip jatyr. Adamzat balasyna orny tolmas qasiret ákelgen soǵys qanshama halyqty qyrǵynǵa ushyratyp, qanshama eldi qanǵa bóktirdi. Olardyń ishinde eń úlken aýyrtpalyqty Keńes Odaǵynyń memleketteri kórdi. Uly Otan soǵysynda 27 mıllıon adam mert boldy. Al Qazaqstan bul jeńiske óziniń laıyqty úlesin qosty. 1 mıllıon 700 myń qazaqstandyq jumyldyrylyp, olardyń 1 mıllıon 200 myńy áskerı áreketterge qatysty. Olardyń jartysy sol soǵystan oralǵan joq. 500 qazaqstandyq eń joǵary ataq - Keńes Odaǵynyń Batyry atandy. Uly Jeńiske tyl eńbekkerleri de ólsheýsiz úles qosty. Olardyń barlyǵynyń esimi bizdiń jadymyzda. Qazaqstan soǵys jyldarynda 1,5 mıllıon qonys aýdarýshylardy qabyldady. Olardyń arasynda úrkinshilikke ushyraǵan halyqtar da boldy. Olardyń barlyǵy kúni búginge deıin Qazaqstanda turyp jatyr», dedi spıker.
Osyǵan qaraı ardagerlerdi kele jatqan merekemen quttyqtaǵan tóraǵa «Biz sizderge úlken alǵysymyzdy bildiremiz. Eger sizderdiń jeńiske umtylystaryńyz, batyrlyq pen jankeshti eńbekterińiz bolmaǵanda búgingi urpaqtyń bolashaǵy bulyńǵyr bolar edi. Sol úshin de biz sizderdi qashanda qadir tutyp, qurmetteımiz», dedi O.Muhamedjanov.