Májilis tóraǵasy keıbir zańdardy qabyldaý nege kidirip turǵanyn aıtty

ASTANA. QazAqparat – Úkimettiń zańǵa bastamashy bolý jumysy tıisti deńgeıde atqarylmaı otyr. Bul týraly segizinshi saılanǵan Parlamenttiń birinshi sessııasyn qorytyndylaý kezinde Májilis tóraǵasy Erlan Qoshanov aıtty, dep habarlaıdy QazAqparat tilshisi.

«Sessııa barysynda Úkimetpen birlese qoıan-qoltyq jumys atqarylǵanyn atap ótken jón. 5 úkimet saǵaty ótkizildi. Úkimet músheleri ǵylym salasyndaǵy, agroónerkásip keshenindegi, óńirlik standarttar, ınvestıtsııalyq klımat jáne basqa da salalardaǵy ahýal týraly baıandady. Osyndaı konstrýktıvti yntymaqtastyq kelesi sessııada jalǵasyn tabady dep senemiz», - dedi E. Qoshanov Parlament palatalarynyń birlesken otyrysynda.

Sonymen qatar ol Úkimetpen birlese jumys isteý kezindegi bolǵan keıbir máselelerge de toqtaldy.

«Birinshiden, Úkimettiń zańǵa bastamashy bolý jumysy tıisti deńgeıde atqarylmaı otyr. Qoǵamda shuǵyl sheshimin kútip otyrǵan túıtkildi másele kóp ekenin bilesizder. Olar, birinshi kezekte, zańnamalyq turǵydan sheshýdi qajet etedi. Ókinishke qaraı, bul jaıttarǵa Úkimet der kezinde kóńil aýdaryp, qajet zań jobalaryn Májiliske ýaqtyly usynbaı otyr. Sondyqtan depýtattar osy ótkir máselelerdi sheshýdi jedel túrde óz qolyna alyp, tıisti zań jobalaryna bastamashy bolýǵa májbúr. Osy oraıda Úkimetke belsendilikti arttyryp, kelesi sessııaǵa naqty ári qoǵamǵa qajet zań jobalaryn ázirleýdi jáne Parlamentke engizýdi tezdetýge tıis», - dedi Májilis tóraǵasy.

Munymen qosa palata spıkeri memlekettik organdardyń jumysyndaǵy kemshilikti aıtty.

«Ekinshiden, depýtattardyń túzetýleri men tolyqtyrýlaryna Úkimet qorytyndysyn qaraý merzimi tym uzaq. Belgilengen tártip bar. Biraq ol tártip kóp jaǵdaıda saqtalmaı otyr. Sonyń saldarynan keıbir zań jobalarynyń qabyldanýy kidirip tur. Sondyqtan Úkimetke qorytyndylardy kelisý rásimin qaıta qaraý kerek dep sanaımyz. Biz jumysymyzdy jańa bastadyq. Aldaǵy ýaqytta memlekettik organdar depýtattardyń bastamalaryn qaraǵan kezde vedomstvolyq múddemen shektelmeýi tıis», - dedi Erlan Qoshanov.

Budan buryn habarlanǵandaı, búgin Senat pen Májilistiń birlesken otyrysy ótip, onda segizinshi saılanǵan Parlamenttiń birinshi sessııasy resmı túrde jabyldy.

Depýtattar bıylǵy 1 qyrkúıekke deıin parlamenttik kanıkýl dep jarııalanatyny týraly arnaıy qaýly qabyldady.