Májilis tóraǵasy et ımportyna qatysty pikir bildirdi

NUR-SULTAN. QazAqparat - Aýyl sharýashylyǵy taýarlaryna negizdelgen óńdeýshi kásiporyndardyń júktemesin arttyrý kerek. Bul týraly Parlament Májilisinde et jáne sút ónimderin óndirýdi, eksporttaýdy damytý taqyrybyndaǵy parlamenttik tyńdaýda palata spıkeri Nurlan Nyǵmatýlın málim etti, dep habarlaıdy QazAqparat tilshisi.

Májilis tóraǵasy et jáne et ónimderi ımportynyń ósimi alańdaýshylyqty týyndatyp otyrǵanyn aıta kele, «qus eti ımportynyń úlesi 51 paıyzdan astam. Ótken jyly onyń kólemi 191 myń tonna bolsa, úsh jyl buryn bul kórsetkish 160 myń tonnan astam edi. Sońǵy úshin jylda jylqy etiniń ımporty da artyp keledi. Máselen, 2016 jyly jylqy etiniń ımporty 900 tonna bolsa, 2018 jyly bul kólem 2,5 ese artyp, 2 myń tonnan asty. Atap aıtqanda, syrtqy naryqta iri eksporttaýshyǵa aınalý úshin elimizde barlyq jaǵdaı bar ekenin bilesizder», - dedi.

Osy oraıda N. Nyǵmatýlın óńdeýshi kásiporyndar júktemesi tómen ekenin atap ótti. Qazirgi kezde ettiń tek 33 paıyzy, súttiń 31 paıyzy qaıta óńdeýmen qamtylýda. Óńdeý kásiporyndarynyń júktemesi 60 paıyz deńgeıinde qalyp otyr. Al Reseı men Belarýste osy tektes kásiporyndardyń júktemesi 80 paıyzdan asty. Sáıkesinshe, atalǵan elder et jáne sút ónimderin Qazaqstanǵa shyǵarýda.

«Jyl saıyn biz 6 myń tonnadan astam sary maıdy, 22 myń tonnaǵa jýyq irimshik pen súzbeni, 6 myń tonnadan astam et konservilerin ımporttaýdamyz. Bul ónimdi bizdiń óńdeýshi zaýyttar óndirýge tıisti ǵoı», - dedi ol.

Osy orada Májilis spıkeri shaǵyn óndirýshilerdi qaıta óńdeýshi kásiporyndarmen baılanystyratyn daıyndaýshy uıymdardyń jelisin qurýǵa barynsha qoldaý jasaý kerektigin jetkizdi. Atap aıtqanda, daıyndaýshy uıymdar úshin qosylǵan qun salyǵyn sýbsıdııalaýdyń tutas tetigi bar.

Munymen qosa, N. Nyǵmatýlın veterınarlyq qaýipsizdik máselesine erekshe mán berý kerektigin atap ótti.