Májilis tóraǵasy depýtattardyń saılaýshylarmen kezdesý kezindegi negizgi mindetin atady
«Keshe Úkimettiń keńeıtilgen otyrysynda Memleket basshysy Qasym-Jomart Toqaev osy ýaqytqa deıin qordalanǵan birqatar problemaǵa qatysty aşy syn aıta otyryp, naqty mindetter júktedi. Osy mindettiń eń bastysy – elimizdiń ekonomıkalyq áleýetin qalpyna keltirip, halyqtyń tabysyn, ál-aýqatyn arttyrý. Bul maqsatqa jetý úshin Prezıdent jurttyń bıznespen aınalysýyna teń jaǵdaı jasaý, eńbek etýge qolaıly jumys oryndaryn ashý, turǵyn úı men densaýlyq máselelerin sheshý, ınflıatsııany aýyzdyqtaý, qosymsha qarajat kózderin qarastyrý, shaǵyn jáne orta kásipkerlikti damytý sııaqty basqa da birqatar basty baǵyttardy atap ótti. Osy oraıda Memleket basshysy shynaıy nátıjege jetý joldaryn kórsetti. Sonymen birge oryn alǵan keleńsizdikterge toqtalyp, elimizde qaryzǵa batqan azamattar men kedeı adamdardyń kóbeıip bara jatqanyn atap aıtty», - dedi E. Qoshanov Májilistiń jalpy otyrysynda.
Osy oraıda Májilis tóraǵasy Prezıdenttiń eskertýlerinen qorytyndy shyǵarý kerek ekenin jetkizdi.
«Jastar arasynda adal eńbek etip, jetistikke jetýden úmit úzip, qol qýsyryp otyratyn úrdis paıda bolǵany da aıtyldy. Biz árqaısymyz osy aıtylǵandardan tıisti qorytyndy shyǵaryp, áreket etýimiz qajet. Óz kezegimizde barlyq áleýmettik-ekonomıkalyq tapsyrmalardy tıisti sapaly zańdarmen qamtamasyz etýge judyryqtaı jumylýymyz kerek. Sonymen birge, endi bir aptadan keıin barlyǵymyz saılaýshylarmen kezdesý úshin aımaqtarǵa shyǵatyn bolamyz. Sol kezde osy naqty qadamdardy árbir saılaýshyǵa, árbir azamatqa jetkizýimiz qajet. El ıgiligine qyzmet etý – ol barshamyzdyń basty paryzymyz», - dedi Erlan Qoshanov.