Májilis tóraǵasy: «Aýqatty bıznesmender» soqyr tıyn tapqan joq, bári tender jaǵalap júr
Eske sala ketsek, Parlament Májilisinde búgin týrıstik qyzmetke qatysty zań jobasy qyzý talqylanǵan bolatyn. Jumys barysynda depýtat Artýr Platonov Kazakh Tourism kompanııasynyń memleket pen bıznes arasynda deldal bolǵaly turǵanyn málim etken edi.
Áriptesiniń usynysyn Májilis tóraǵasy Nurlan Nyǵmatýlın qoldady.
«Týrıstik qyzmetti damytý týraly zań jobasyn paıdalanyp, bıýdjet qarajatyn jeke sektorǵa jańasha quıýdyń esh qajeti joq. Bul jerde sizder maǵynany ózgerte salǵansyzdar (Aqtoty Raıymqulovaǵa qarata). Bıznesti qoldaý degen bıýdjet qarajatyn tyqpalaı berýmen shektelmeýi kerek. Kompanııalardy quryp tastaǵan salalar jeterlik. Júr áne, ózderin «aýqatty bıznesmen» sanaıdy, al qarasań onyń barlyq bıznesi memlekettik jáne kvazımemlekettik tenderge baılanǵan. Soqyr tıyn ınvestıtsııa, bir tehnologııa da alyp kelgen joq. Bıdaı shoqyp júr, áıteýir. Munda da ulttyq kompanııa quryp, bıýdjet qarajatyn salamyz. Al ol bolsa taǵy da týrıstik salaǵa qarajat tyqpalaýmen aınalysady. Túsiniktiń ózi basqasha bolýy kerek», - dedi Nurlan Nyǵmatýlın Májilis otyrysynda.
Májilis tóraǵasy Mádenıet jáne sport mınıstrine bul turǵyda zańnamalyq turǵyda týrıstik saladaǵy bıznesmenderge jaıly jaǵdaı jasalýy kerektigin eskertti.
«Ol degenimiz – zamanǵa saı ınfraqurylym, ádiletti salyq júıesi. Eń birinshi kezekte, mine osy máselelerdi rettep alýymyz kerek. Álbette, ulttyq kompanııalar arqyly bıýdjetti jeke sektorǵa bere salsaq, keıin esep bere salý sizderge túkke turmaıdy. Odan da kúrdeli bolsa da, durysy – jaıly jaǵdaı jasaý. Baǵana aıtqanymyzdaı, bizdiń kompanııalardyń básekege qabiletin arttyrý kerek. Ol úshin týrıstik kompanııalardy jınap, tyńdap, olardyń problemasy qandaı ekenin uǵynyp alý kerek. Mádenıet jáne sport mınıstrligi osy sharýamen aınalysýy tıis», - dedi ol.