Májilis TMD-ǵa múshe memleketter arasyndaǵy salyq saıasaty týraly kelisimdi toqtatty
Qujattyń tolyq ataýy – «1992 jylǵy 13 naýryzdaǵy Táýelsiz Memleketter Dostastyǵyna qatysýshy memleketterdiń úkimetteri arasyndaǵy kelisilgen salyq saıasatynyń qaǵıdattary týraly kelisimniń qoldanysyn toqtatý týraly hattamany ratıfıkatsııalaý týraly» Zańynyń jobasy. Bul qujatty Premer-Mınıstrdiń orynbasary – Qarjy mınıstri Erulan Jamaýbaev tanystyrdy.
«Hattama TMD elderi tarapynan kelisimniń merzimin uzartý týraly ótinimniń bolmaýyna, sondaı-aq kelisimdegi erejelerdiń qazirgi talaptarǵa sáıkes kelmeýine baılanysty kún tártibine shyǵarylyp otyr», - dedi vedomstvo basshysy.
Onyń aıtýyna qaraǵnada, 1992 jyly bul kelisimge TMD-ǵa múshe 9 memlekettiń basshysy qol qoıǵan. Ol qujat boıynsha atalǵan memleketter salyq salý saıasatyn birizdendirý negizinde uıym aýmaǵynda negizgi salyqtardyń biryńǵaı tizbesin paıdalaný kerek bolǵan. Alaıda TMD-ǵa múshe 4 memleket ol qujatty ratıfıkatsııalasa, qalǵan 5 memleket óz tarapynan tıisti jumystardy tyndyryp úlgermegen. Aqyry 2017 jyly uıymǵa qatysýshy elderdiń salyq organdaryna jaýapty basshylary atalǵan kelisimdi toqtatý týraly ortaq sheshimge kelgen.
«Osylaısha 2021 jylǵy 4 naýryzda kelisimniń qoldanysyn toqtatý týraly hattamaǵa qol qoıyldy. Búginde salyq qyzmetiniń shet memlekettermen, onyń ishinde TMD elderimen ózara is-qımyly halyqaralyq sharttar negizinde retteletinin atap ótý kerek», - dedi mınıstr.
Aıta keteıik, Májilis konstıtýtsııaǵa engiziletin ózgeristerdi qamtıtyn zań jobasyn qaraı bastady.