Májilis taratylsa da elimizde zań shyǵarý qyzmeti toqtamaıdy – Máýlen Áshimbaev

ASTANA. QazAqparat – QR Parlamenti Senatynyń tóraǵasy Máýlen Áshimbaev óziniń Facebook paraqshasynda Májilistiń taratylýy jáne 19 naýryzda ótetin Májilisiń kezekten tys saılaýy týraly pikir bildirdi, dep habarlaıdy QazAqparat.

«Búgin Memleket basshysy Qasym-Jomart Kemeluly Toqaev Parlament palatalarynyń tóraǵalarymen jáne Premer-Mınıstrmen keńesip, Májilisti taratý jáne máslıhattardyń ókilettigin merziminen buryn toqtatý týraly Jarlyqtarǵa qol qoıdy. Soǵan baılanysty 2023 jylǵy 19 naýryzda Májilistiń kezekten tys saılaýy ótedi. Barlyq deńgeıdegi máslıhattardyń saılaýyn Ortalyq saılaý komıssııasy belgileıdi»,-dep jazdy, Senat tóraǵasy.

Onyń sózinshe, byltyr ótken referendýmda halyqtyń basym bóligi elimizdiń saıası júıesin ózgertýge qatysty bastamalardy qoldap, daýys berdi. Sonyń nátıjesinde konstıtýtsııalyq reformalar iske asyryla bastady. Búgin qabyldanǵan sheshim de osy baǵyttaǵy keshendi jumystardyń jalǵasy ekeni sózsiz.

Aldaǵy saılaýlar jańa tártippen ótedi. Mundaı qadam elimizde demokratııany nyǵaıtýǵa jáne halyqtyń aldynda bedeli bar jańa tulǵalardyń saıasatqa kelýine jol ashady. Saılaýshylardyń senimine ıe bolǵan azamattar kún tártibinde turǵan mańyzdy máselelerdi sheshýge jáne Prezıdentimiz aıqyndaǵan basymdyqtardy júzege asyrýǵa tyń serpin beredi dep senemiz.

«Osy rette Májilis taratylsa da elimizde zań shyǵarý qyzmeti toqtamaıtynyn aıryqsha atap ótken jón. Soǵan sáıkes qazir Parlamenttiń mindeti tolyǵymen Senatqa júktelip otyr. Bul – bizdiń Palata úshin úlken jaýapkershilik. Aldymyzda aýqymdy jumystar tur. Osyndaı mańyzdy kezeńde Senat elimizdiń damýy úshin qajetti zańdardy ýaqtyly ári sapaly túrde qabyldaıtyn bolady»,-dedi Máýlen Áshimbaev.

Osyǵan deıin Májilis taratylǵanymen Parlamenttiń fýnktsııalaryn Senat atqaratynyn jazǵan bolatynbyz.