Májilis sýdıalar korpýsynyń kásibıligin arttyrýǵa baǵyttalǵan qujatty maquldady
Zań jobasyn QR Parlamentiniń depýtattary Qazaqstan Respýblıkasy Prezıdenti janyndaǵy Sot jáne quqyq qorǵaý júıelerin reformalaý jónindegi komıssııa ázirlegen sot júıesin jetildirý jónindegi tásilderdi iske asyrý maqsatynda ázirledi.
Osylaısha, zań jobasynda sýdıalar korpýsynyń kásibıligin arttyrýǵa, sondaı-aq sýdıalardyń jaýapkershiligi men táýelsizdigin arttyrýǵa baǵyttalǵan túzetýlerdiń eki blogy kózdelip otyr.
Májilistiń Zańnama jáne sot-quqyqtyq reforma komıtetiniń málimetinshe, zań jobasynda sýdıa kadrlardy irikteý jáne sýdıalardyń kásibı qyzmetin baǵalaý tetikterin jetildirýge, sýdıalardy jaýapqa tartýdyń eskirgen merzimderin ulǵaıtýǵa, sondaı-aq sottardy qarjylandyrýdyń jańa modelin belgileýge baǵyttalǵan ózgerister men tolyqtyrýlar engizý kózdelýde.
Sottardy qarjylandyrýdyń jańa modelin belgileý, sondaı-aq sýdıalardyń ózin-ózi basqarý organdarynyń qarajatty bólýi sot júıesiniń táýelsizdigin qamtamasyz etedi, sondaı-aq sot tóreligin tolyq ári táýelsiz júzege asyrý múmkindigin jetkilikti dárejede qamtamasyz etýge múmkindik beredi.
Respýblıka Konstıtýtsııasynda sottardy qarjylandyrý, sýdıalardy turǵyn úımen qamtamasyz etý respýblıkalyq bıýdjet qarajaty esebinen júrgiziledi jáne ol sot tóreligin tolyq ári táýelsiz júzege asyrý múmkindigin qamtamasyz etýge tıis dep belgilengen.
Jumys toby aıasynda zań jobasyn talqylaý kezinde tártiptik is júrgizý aıasynda sýdıanyń is-áreketin tekserý úshin oǵan qatysty materıaldardy Sot jıýrıine berý týraly máselelerdi oblystyq sottyń jalpy otyrysynyń talqylaýyna shyǵarý merzimderin naqtylaý boıynsha túzetýler qabyldandy.
«Qazaqstan Respýblıkasynyń sot júıesi men sýdıalarynyń mártebesi týraly» Konstıtýtsııalyq zańnyń 30-babyna oblystyq sottyń sýdıasy qyzmetine úmitker, quqyqtyń jekelegen salalarynyń mamandary bolyp sanalatyn adamdardy konkýrstyq irikteýge qatysty naqtylaýshy túzetýler engizildi.
Sondaı-aq aýdandyq sottarda teń dárejeli laýazymdarǵa kandıdattardy irikteý kezinde shalǵaıdaǵy jáne quramy az sottarda keminde bes jyl jumys istegen sýdıanyń basymdyǵyna qatysty túzetýler engizildi.
Budan basqa, quqyqtyq olqylyqtardy bolǵyzbaý, zań jobasynyń normalaryn bir-birine jáne Qazaqstan Respýblıkasynyń basqa da zańnamalyq aktilerine sáıkes keltirý maqsatynda zań jobasynyń búkil mátini boıynsha zań tehnıkasyna qatysty jáne redaktsııalyq, naqtylaýshy sıpattaǵy túzetýler engizildi.
Parlament Májilisiniń turaqty komıtetteri zań jobasy boıynsha oń qorytyndylaryn berdi.
Budan bólek, jalpy otyrysta «Qazaqstan Respýblıkasynyń keıbir zańnamalyq aktilerine sot júıesi máseleleri boıynsha ózgerister men tolyqtyrýlar engizý týraly» ilespe zań jobasy da ekinshi oqylymda maquldandy.