Májilis spıkeri men Ońtústik Koreıa Elshisi EKSPO-2017 ózektiligin atap ótti

ASTANA. QazAqparat - Búgin QR Parlamenti Májilisiniń Tóraǵasy Nurlan Nyǵmatýlın Koreı Respýblıkasynyń Qazaqstandaǵy Tótenshe jáne Ókiletti Elshisi Desıka Kımdi qabyldady. Taraptar eki el arasyndaǵy qarym-qatynastyń ózekti jáne parlamentaralyq yntymaqtastyq máselelerin talqylady, dep habarlaıdy QazAqparat.

Palata baspasóz qyzmetiniń málimetinshe, Májilis spıkeri Koreıa Qazaqstannyń Shyǵys Azııadaǵy strategııalyq mańyzdy seriktesteriniń biri ekendigin aıta kele, eki memlekettiń qarym-qatynasyndaǵy ózara saıası belsendilikti atap ótti.

N. Nyǵmatýlınniń málimdeýinshe, QR Prezıdenti Nursultan Nazarbaevtyń 2016 jyldyń qarashasyndaǵy Seýlge sapary jańa strategııalyq seriktestiktiń keleshegine jol ashty.

Óz kezeginde koreıalyq dıplomat Elbasy N. Nazarbaevtyń el órkendeýindegi sarabdal saıasatyn atap ótip, koreı dıasporasyna degen yqylasyna alǵysyn bildirdi.

Ol Astanada ótip jatqan EKSPO- 2017 mańyzyna, Ońtústik Koreıanyń ınnovatsııalyq múmkindikterine, sonymen qatar óndiris salasyna, elektr energııasyn saqtaý men paıdalaný, «jasyl» energetıka men energııa kózderin jańǵyrtý máselelerine toqtaldy.

Desık Kım koreı Úkimetiniń Astanadaǵy halyqaralyq kórmege qyzyǵýshylyǵy jaıyn aıtyp, onyń tabysty ótetinine senim bildirdi. Áńgime barysynda ıadrolyq qarýsyzdaný men ony taratpaýǵa da nazar aýdaryldy.

Spıker men Elshi júzdesýde eki el parlamentaralyq qatynastardy nyǵaıtý, Azııa parlamentaralyq Assambleıasy jáne Parlamentaralyq Odaq sheńberindegi baılanystardyń tıimdiligin tilge tıek etti.