Májilis shekara mańynda turatyn qazaqstandyqtar úshin mańyzdy qujatty maquldady

NUR-SULTAN. QazAqparat - Parlament Májilisiniń jalpy otyrysynda «2006 jylǵy 3 qazandaǵy QR Úkimeti men RF Úkimeti arasyndaǵy Qazaqstannyń jáne Reseıdiń shekara mańyndaǵy aýmaqtary turǵyndarynyń Qazaqstan-Reseı memlekettik shekarasyn kesip ótý tártibi týraly kelisimge ózgerister engizý týraly hattamany ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Eki el arasyndaǵy shekara 7 500 shaqyrymnan asady jáne álemdegi eń uzyn shekara bolyp sanalady. Qazirgi ýaqytta Qazaqstan-Reseı shekarasynda 51 ótkizý beketi bar. Olardyń 30-y avtokólik, 20-sy temirjol jáne taǵy bireýi ózen arqyly iske asyrylady. Sonymen birge, shekara mańyndaǵy turǵyndarǵa arnalǵan 86 ótkizý beketteri jumys atqarýda.

Hattamamen kelisimniń 3-qosymshasynda kórsetilgen Shekara mańyndaǵy aýmaqtarda turatyn Qazaqstan men Reseı azamattarynyń shekarany kesip ótýi úshin jaramdy qujattar tizbesine ózgerister engizilip otyr.

«Qazaqstannyń ishki zańnamasynda azamattardy tirkeý kitabynyń kúshin joıýyna jáne mekenjaı anyqtamasynyń engizýine oraı atalǵan kelisimge tıisti ózgerister engizý qajettigi týyndady. Bul ózgerister 2018 jyly 9 qarashada Petropavlda 15-shi Óńiraralyq yntymaqtastyq forýmynda qol qoıylǵan hattamamen engizildi. Qazirgi ýaqytta aýyldyq aýmaqtardyń barlyq ákimderinde ınternet jelisin qoldaný arqyly mekenjaı kýáligin beretin múmkindigi bar. Osyǵan baılanysty bul hattamany qabyldaý Qazaqstan-Reseı memlekettik shekarasynyń mańyndaǵy aýmaqtarynda turatyn Qazaqstan azamattarynyń ótý úderisin jeńildetýge jáne tártipke keltirýge múmkindik beredi», - dedi QR Syrtqy ister mınıstri Beıbit Atamqulov.

Sonymen birge, Reseıdiń Syrtqy ister mınıstrliginiń 2019 jyly 12 sáýirde joldaǵan notasynda RF tarapy hattamanyń kúshine enýi úshin qajetti memleketishilik rásimder aıaqtalǵanyn habarlady.