Májilis Semeı ıadrolyq qaýipsizdik aımaǵyna qatysty qujatty qabyldady
Atalǵan zańynyń jobasyn Parlament Májilisi 2022 jylǵy 13 sáýirde birinshi oqylymda maquldady.
«Zań jobasy radıatsııalyq jáne ekologııalyq qaýipsizdiktiń tıisti deńgeıin qamtamasyz etý, burynǵy ıadrolyq polıgonnyń jerlerin paıdalaný jáne onyń aýmaǵyn ońaltý máselelerinde memlekettik baqylaýdy kúsheıtý maqsatynda Semeı ıadrolyq qaýipsizdik aımaǵy jerlerin qurýdy kózdeıdi. Depýtattar zań jobasyn ekinshi oqylymǵa ázirleý barysynda keshendi ekologııalyq zerttep-qaraýdy júrgizý kezinde radıoekologııalyq jaǵdaıǵa sapaly ári dáıekti taldaýdy qamtamasyz etý qaýipsizdigi qaǵıdatyn qamtıtyn Semeı ıadrolyq qaýipsizdik aımaǵy qyzmetin zańnamalyq retteý qaǵıdattaryn belgileýge baǵyttalǵan túzetýlerdi engizdi. Ekinshiden, memlekettik organdardyń Semeı ıadrolyq qaýipsizdik aımaǵyn qurý jáne onyń jumys isteýi salasyndaǵy quzyreti naqtylandy. Úshinshiden, ýákiletti organnyń Semeı ıadrolyq qaýipsizdik aımaǵynyń pasportyn tirkeýge arnalǵan quzyretin naqtylaýǵa, ıadrolyq qarýdy synaý júrgizilgen jer ýchaskelerine keshendi ekologııalyq zerttep-qaraý júrgizý ádistemesin ázirleý men bekitýge arnalǵan túzetý qamtyldy», - dedi Májilis depýtaty Edil Jańbyrshın.
Depýtattar ilespe zań jobasymen jumys barysynda:
- zapastaǵy jerlerdi ıadrolyq qaýipsizdik aımaǵynyń jerlerine aýystyrý tártibin naqtylaýǵa;
- ıadrolyq qaýipsizdik aımaǵy jerlerinde jer paıdalaný quqyǵyna qatysty mámileler jasasýǵa tyıym salýdy belgileýge baǵyttalǵan túzetýlerdi engizdi.
«Zań jobasyn qaraý barysynda salyq, jer jáne ekologııalyq zańnamaǵa sáıkes arnaıy quqyqtyq rejımdi belgileý maqsatymen depýtattar «Salyq jáne bıýdjetke tólenetin basqa da mindetti tólemder týraly» kodekske (Salyq kodeksi) tıisti túzetýler engizdi. Jumys tobynyń otyrystarynda talqylaý barysynda zań jobasy normalarynyń bir bóligi naqtylanyp, redaktsııalyq turǵydan jaqsartyldy, zań jobasynyń mátini zań tehnıkasynyń qaǵıdalary men norma shyǵarmashylyq praktıkasyna sáıkes keltirildi», - dedi depýtat.