Májilis saılaýynda alǵash ret ulttyq baıqaýshylar akkredıtteldi

ASTANA. QazAqparat – Naýryzdyń 19 kúni ótetin kezekten tys Májilis depýtattaryn saılaýda alǵash ret ulttyq baıqaýshylar akkredıtteldi. Bul týraly Ortalyq saılaý komıssııasynyń tóraǵasy Nurlan Ábdirov aıtty, dep habarlaıdy QazAqparat tilshisi.

«Saılaý týraly» Konstıtýtsııalyq zańnyń normalaryna sáıkes, qoǵamdyq birlestikter men kommertsııalyq emes uıymdardan, saıası parııalardy qospaǵanda, ulttyq baıqaýshylardy akkredıtteý ınstıtýty engizildi. Ulttyq baıqaýshylardy akkredıtteý – bul jalpy saılaý naýqanda alǵash ret qoldanylyp otyrǵan zańnama jańalyqtarynyń biri», - dedi Nurlan Ábdirov komıssııa otyrysynda.

Onyń atap ótýinshe, óz jarǵysynda saılaýdy baıqaý quqyǵyn rastaıtyn qoǵamdyq nemese ózge de kommertsııalyq emes uıymdar tıisti saılaý komıssııasynda akkredıtteý rásiminen óte alady.

«Bul týraly biz Ortalyq saılaý komıssııasynyń otyrysynda saılaý protsesiniń barlyq qatysýshylaryn habardar edip, aǵymdaǵy saılaý naýqanyn baıqaý úshin osy máselege jedel kirisýge shaqyrǵan bolatynbyz», - dedi ol.

Nurlan Ábdirovtiń aıtýynsha, akkredıtteý belgili bir saılaý naýqanynda ǵana qoldanylmaıdy. Akkredıtteý alynǵan sátten bastap 1 kúntizbelik jyl boıy qoldanylady.

«Rásimniń ózi uıymnyń qyzmetin ádilet organdarynyń rastaýyn kózdeıdi jáne ony ótkizý merzimi 30 kúndi quraıdy. Osyǵan baılanysty aǵymdaǵy saılaý naýqany aıasynda úlgermeı, keıinnen akkredıttelgen uıymdar aldaǵy 1 jyl ishinde ótetin kelesi saılaý naýqandarynda baıqaýǵa qatysýǵa múmkindigi bar ekendigin atap aıtamyn», - dedi OSK tóraǵasy.