Májilis Saılaýy: OSK taǵy 12 baıqaýshyny tirkedi

ASTANA. QazAqparat – Búgin Ortalyq saılaý komıssııasy 19 naýryzda ótetin kezekten tys Májilis saılaýyna taǵy 12 sheteldik baıqaýshyny akkredıttedi, dep habarlaıdy QazAqparat tilshisi.

«2023 jylǵy 20 qańtarda halyqaralyq baıqaý ınstıtýty ashylǵannan beri Ortalyq saılaý komıssııasy 3 shet memleketten, 2 halyqaralyq uıymnan 62 baıqaýshyny resmı tirkeýden ótkizgen bolatynbyz. Búgingi tańda Syrtqy ister mınıstrliginen 3 shet memleketten, 2 halyqaralyq uıymnan 12 baıqaýshyny tirkeýden ótkizýdi usyndy. Atap aıtsaq, Koreıa Respýblıkasy, Qyrǵyz Respýblıkasynan 1 baıqaýshydan, TMD-nyń baıqaýshylar mıssııasynan 7, Demokratııalyq ınstıtýttar jáne adam quqyqtary jónindegi bıýrosynyń saılaýdy baıqaý jónindegi mıssııasynan 2 baıqaýshy usynyldy», - dedi Ortalyq saılaý komıssııasynyń hatshysy Muhtar Erman komıssııa otyrysynda.

Onyń atap ótýinshe, 10 aqpanda OSK-ge 2023 jylǵy 19 naýryzǵa taǵaıyndalǵan Májilis depýtattarynyń kezekten tys saılaýyna tirkeýden ótken DIAQB mıssııasynyń 2 múshesi baıqaýǵa qatysa almaıtyndyǵyn málimdegen jáne Syrtqy ister mınıstrliginen olardy tizimnen alyp tastaý týraly usynym kelip túsken.

«Osyǵan baılanysty DIAQB mıssııasynyń 2 baıqaýshysynyń tirkelýin keri qaıtaryp alý týyndap otyr», - dedi ol.

Osydan keıin Ortalyq saılaý komıssııasy usynylǵan baıqaýshylardy tirkeý jáne 2 baıqaýshynyń tirkelýin qaıtaryp alý týraly qaýly qabyldady.