Májilis saılaýy: OSK saılaýshylarǵa úndeý jasady
«Saılaýǵa qatysýǵa konstıtýtsııalyq quqyqty iske asyrýdyń kepili – sizdiń saılaýshylar tizimin engizilýińiz. Tizimdi daýys berýge arnalǵan naqty ýchaskeniń aýmaǵynda, turǵylyqty jeri boıynsha turaqty tirkeý negizinde jergilikti atqarýshy organdar – ákimdikter jasaıdy. Turaqty tirkeýi joq azamattar tizimge ózderi turatyn jerdegi ákimdikterge bergen ótinishiniń negizinde engiziledi. Daýys berý kúni óziniń tirkelgen jeri boıynsha saılaý ýchaskesine kele almaıtyn ár azamat daýys berý kúnine 30 kún qalǵanda, ıaǵnı, 2023 jylǵy 17 aqpannan keshiktirmeı tıisti ákimdikke ótinish berip, óziniń naqty ornalasqan jeri boıynsha saılaý ýchaskesinde tirkelýge quqyly. Ótinish túsken kezde ákimdik azamatty tirkelgen jeri boıynsha tizimnen shyǵaryp, ony daýys beretin ýchaskeniń tizimine engizedi» delingen úndeýde.
Sonymen qatar qujatta atalǵan quqyqty daýys berý kúni tirkelgen jerinde bolmaıtyn azamattar, basqa qaladan kelgen, arnaýly joǵary jáne orta oqý oryndarynda oqıtyn, jataqhanadan tys turatyn stýdentter, vahtalyq ádispen jumys isteıtin azamattar paıdalana alady.
«Azamat birtutas jalpyulttyq saılaý okrýgin, sonymen qatar birmandattyq saılaý okýrgterin eskere otyryp, saılaýshylardyń bir ǵana tizimine engizile alady. Saılaýshylar tizimine tirkelgen jerińiz boıynsha enip-enbegenińizdi tıisti ákimdiktiń saıty nemese koll-ortalyǵy arqyly tekserýge bolady. 2023 jylǵy 4 naýryzdan bastap sizge óz ýchaskeńizdegi saılaýshylar tizimindegi derekterińizdi tekserý múmkindigi beriledi. Qurmetti saılaýshylar! Sizderdi quqyqtyq saýat tanytyp, saılaýǵa qatysý konstıtýtsııalyq quqyǵyńyzdy iske asyrýǵa shaqyramyz. Ózińizdi saılaýshylar tizimine engizý úshin tıisti áreketterdi ýaqytyly qabyldańyz. Árkimniń daýysy mańyzdy», - dedi úndeýdi jarııalaǵan Shavkat Ótemisov.