Májilis salyqtyq amnıstııaǵa baǵyttalǵan qujatty maquldady

ASTANA. QazAqparat - Búgin Parlament Májilisinde palata depýtattary «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldady. Endi qujat Parlament Senatyna joldanady.

Zań jobasynyń maqsaty eldiń odan ári turaqty áleýmettik-ekonomıkalyq damýy úshin qolaıly kásipkerlik orta qurý jáne bızneske jaǵdaı jasaý bolyp tabylady. Bul rette eń aldymen Elbasy júktegen tapsyrmaǵa sáıkes, bıznesti damytý maqsatynda 2014 jyldyń 1 qańtaryndaǵy jaǵdaı boıynsha salyq tóleýshilerdiń jeke shottarynda esepte turǵan jáne 2014 jyldyń 1 qazandaǵy jaǵdaı boıynsha tólenbegen ósimpuldardyń somalaryn esepten shyǵarý, ósimpul men aıyppuldardan bosatý arqyly salyqtyq amnıstııa júrgizý usynylady. Salyqtyq amnıstııany júrgizý salyq tóleýshilerge bosatylǵan qarajatty bıznesti damytýǵa jumsaýǵa múmkindik beredi. Bunymen qosa, atalǵan shara ishki ınvestıtsııalardyń áleýetin kúsheıtedi.

Budan bólek, aýyl sharýashylyq ónimderin óńdeýdi yntalandyrý jáne agroónerkásip kesheni sýbektileriniń básekege qabilettiligin arttyrý úshin olarǵa salyq salý tártibi reformalanatyn bolady. Sonymen qatar, jer ýchaskelerin utymdy paıdalaný maqsatynda sharýa qojalyqtaryn qorshaǵan ortaǵa emıssııadan bosata otyryp, biryńǵaı jer salyǵynyń mólsherlemesin 1,5 esege, aýyl sharýashylyǵynyń taýar óndirýshi zańdy tulǵalar úshin jer salyǵynyń stavkasyn 5 esege arttyrý kózdeledi.

Budan bólek, EKSPO kórmesin ótkizý maqsatynda 2017 jylǵa deıin EKSPO-ny uıymdastyrý men ótkizý boıynsha qyzmetti júzege asyratyn zańdy tulǵalarǵa salyq salý obektilerin jalǵa berý kezinde jer salyǵyn jáne múlik salyǵynan bosatý kózdeledi.

Sonymen qatar, depýtattar engizgen túzetýge sáıkes, «Metropolıten» memlekettik kásiporny da múlik salyǵyn tóleýden bosatylady.