Májilis pen máslıhat saılaýynda 4-5 bıýlleten bolady

ASTANA. QazAqparat – 19 naýryzda ótetin Májilis pen máslıhattar saılaýynda saılaýshylar 4 nemese 5 bıýlletende daýys beredi, dep habarlaıdy QazAqparat tilshisi.

«Saılaýda bir emes, 4 nemese 5 bıýlleten bolady. Parlament Májilisi depýtattaryn proportsıonaldy negizde, ıaǵnı partııa tizimi boıynsha saılaýǵa bólek bıýlleten bolady. Ol barlyq óńirlerde barlyq saılaý ýchaskelerinde taratylady. Ekinshi bıýlleten – Parlament Májilisiniń birmandatty depýtatyna arnalǵan, munda ár okrýgten 29 depýtat saılanady», - dedi QR Ortalyq saılaý komıssııasy tóraǵasynyń orynbasary Konstantın Petrov komıssııanyń búgingi otyrysynda.

Úshinshi bıýlletende – oblystardyń, respýblıkalyq mańyzy bar qalalardyń, el astanasynyń máslıhattaryna saılanǵysy keletin partııalar tizimi bolady.

Tórtinshi bıýlleten – oblystyq jáne respýblıkalyq mańyzy bar qalalardyń, el astanasynyń birmandatty okrýgy úshin taratylady, onda da kandıdattar usynylady.

«Besinshi bıýlleten oblystarda 17 óńirde qoljetimdi bolady, bul qalalyq nemese aýdandyq majorıtarlyq bıýlleten bolady. Máselen, Túrkistan oblysynyń Shardara aýdanynda turatyn adamǵa óz aýdanynyń máslıhatynyń depýtattaryn saılaý bıýlleteni beriledi. Osylaısha, megapolısterde 4 bıýlleten, qalǵan óńirlerde 5 bıýlleten bolady», - dedi K. Petrov.

Sonymen birge «Bárine qarsymyn» baǵanasy barlyq bıýlletende kórinis tabady.