Májilis pen máslıhat saılaýy: Qandaı uıymdar kandıdattar usyna alady

ASTANA. QazAqparat – QR Ortalyq saılaý komıssııasy tóraǵasynyń orynbasary Konstantın Petrov Májilis pen máslıhat saılaýyn ótkizýdiń negizgi kezeńderin atady, dep habarlaıdy QazAqparat tilshisi.

QR Konstıtýtsııasyna sáıkes, Parlament Májilisi aralas saılaý júıesi boıynsha Konstıtýtsııalyq zańda belgilengen tártippen saılanatyn 98 depýtattan turady.

«QR saılaý týraly» Konstıtýtsııalyq zańǵa sáıkes, biryńǵaı jalpyulttyq saılaý okrýgi aýmaǵy boıynsha Májilistiń 69 depýtaty, bir mandatty aýmaqtyq saılaý okrýgteri boıynsha – 29 depýtat saılanady.

«Parlament Májilisiniń depýtattyǵyna sońǵy 10 jyl boıy Qazaqstan aýmaǵynda turatyn, 25 jasqa tolǵan azamat kandıdat bola alady. Máslıhat depýtattyǵyna 20 jasqa tolǵan Qazaqstan Respýblıkasynyń azamaty kandıdat bola alady. Zańda belgilengen tártippen ótelmegen nemese alynbaǵan sottylyǵy bar adam jáne sybaılas jemqorlyq qylmys pen sybaılas jemqorlyq quqyqbuzýshylyq jasaýda kinási zańda belgilengen tártippen sotta anyqtalǵan adam QR Parlamenti Májilisiniń jáne máslıhatynyń depýtattyǵyna kandıdat bola almaıdy», - dedi Konstantın Petrov OSK otyrysynda.

Parlament Májilisi men máslıhat depýtattyǵyna kandıdattar usyný quqyǵy myna uıymdarda bolady:

1) partııalyq tizimder boıynsha saılanatyndar – saıası partııalar;

2) birmandatty aýmaqtyq saılaý okrýgteri boıynsha saılanatyndar – saıası partııalar, qoǵamdyq birlestikter, olardyń qurylymdyq bólimsheleri (fılıaldary men ókildikteri) jáne azamattar ózin-ózi usyný arqyly saılanady.

«Partııalyq tizim boıynsha qujattar Ortalyq saılaý komıssııasyna, birmandatty saılaý okrýgteri boıynsha qujattar – tıisti okrýgterge usynylady», - dep naqtylady K. Petrov.