Májilis ósimdikterdi qorǵaýǵa qatysty qujatty maquldady
Atalǵan zań jobasy birinshi oqylymda 2021 jylǵy 15 maýsymda maquldanǵan bolatyn.
Onyń negizgi maqsaty - ósimdikter dúnıesin kúzetý, qorǵaý, qalpyna keltirý jáne onyń barlyq alýan túrin paıdalaný salasyndaǵy qatynastardy retteýdi qamtamasyz etý.
«Sonymen qosa ósimdikterdiń jabaıy ósetin túrleriniń tabıǵı ártúrliligi men gendik qoryn saqtaý, olardy tıimdi paıdalaný úshin quqyqtyq negiz jasaý eskerilgen. Zań jobasynda birqatar negizgi uǵymdar men termınder naqtylandy nemese jańa redaktsııada jazyldy. Ósimdikter dúnıesine menshik quqyǵyn kózdeıtin jańa normalar «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» 2022 jylǵy 8 maýsymdaǵy Qazaqstan Respýblıkasynyń Zańyna sáıkestendirildi. Jumys tobynyń músheleri ósimdikter dúnıesin paıdalanýdyń ortaq paıdalaný jáne arnaıy paıdalaný tártibindegi túrlerin kózdeıtin túzetýlerin qoldady. Jeke jáne zańdy tulǵalardyń, onyń ishinde ósimdikter dúnıesin arnaıy paıdalanýdy júzege asyratyn tulǵalardyń quqyqtary men mindetteri kózdelgen, memlekettik organdardyń ókilettikteri naqtylandy», - dedi depýtat Eldos Abaqanov.
Onyń aıtýynsha, jabaıy ósetin jemisterdi, sańyraýqulaqtardy, jıdekterdi, dárilik shıkizatty jáne ózge de ósimdikter resýrstaryn jeke tulǵalar óteýsiz jáne ruqsat qujattarsyz paıdalana alady.
«Ósimdikterdiń ártúrliligin saqtaý maqsatynda resýrstyq zertteý negizinde aıqyndalatyn ósimdikter resýrstaryn paıdalaný lımıtterin belgileıtin túzetý qarastyryldy. Ósimdikter resýrstarynyń qorlaryna resýrstyq zertteý júrgizetin mamandandyrylǵan uıymdardy mindetti akkredıtatsııalaý eskerildi. Sonymen qatar, ósimdikterdi ıntrodýktsııalaý jáne jersindirý jónindegi qyzmetti júzege asyrý úshin aldyn ala habarlandyrý tártibi belgilendi. Depýtattar jergilikti atqarýshy organdardyń jasyl ekpelerdi kútip-baptaý, túgendeý júrgizýdi qamtamasyz etý, jasyl ekpelerdiń tizilimi men esebin júrgizý jáne olardyń jaı-kúıine monıtorıng júrgizý jónindegi ókilettikterin keńeıtýge baǵyttalǵan túzetýler engizdi. Zań jobasynyń birqatar normasy Qazaqstan Respýblıkasynyń ósimdikter dúnıesi salasyndaǵy zańnamasy talaptarynyń saqtalýyna memlekettik baqylaýdy engizýge, sondaı-aq baqylaý sýbektisine (obektisine) barý arqyly tekserý túrlerin jáne olardy júzege asyrý tártibin naqtylaýǵa baǵyttalǵan», - dedi depýtat.