Májilis mınıstrlerdiń derbestigin arttyrýǵa baǵyttalǵan zań jobasyn maquldady

ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik basqarý deńgeıleri arasyndaǵy ókilettikterdiń arajigin ajyratý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy. Eske sala keteıik, qujatty Memleket basshysy Parlamentte shuǵyl qaraý týraly tapsyrma júktegen bolatyn.

Zań jobasy negizinen aǵymdaǵy jyldyń 6 tamyzynda Memleket basshysynyń Úkimettiń keńeıtilgen otyrysynda júktegen tapsyrmalaryn oryndaýǵa jáne Prezıdenttiń 25 tamyzdaǵy Jarlyǵyn júzege asyrýǵa baǵyttalady.

Bul rette Elbasy Jarlyqtaryna sáıkes, zań jobasy Úkimet pen mınıstrlikterdiń, mınıstrlikter men jergilikti atqarýshy organdardyń arasynda quzyretti naqty bólýdi qamtamasyz etýge, mınıstrlerdiń sheshim qabyldaýdaǵy derbestigin arttyrýǵa, sonymen birge, olardy iske asyrý boıynsha ózge de sharalardy qabyldaýǵa baǵyttalǵan.

Zań jobasyna sáıkes, jergilikti bılik deńgeıleri arasynda oblystyqtan aýdandyq deńgeıge 14 fýnktsııany ótkizý kózdelip otyr. Olardyń arasynda oblys aýmaǵynda sporttyq ǵımarattar qurylysy máselelerin úılestirý, shalǵaıdaǵy eldi mekenderde turatyn balalardy jalpy bilim beretin orta mektepterge tasymaldaý tártibi sekildi máseleler bar. Budan bólek, zań jobasy boıynsha sáýlet-qurylys jumystaryn qadaǵalaý salasynda jergilikti atqarýshy organdarǵa lıtsenzııalaý, attestatsııalaý jáne baqylaý, qala qurylysy jáne qurylys, nysandar qurylysynyń sapasyna memlekettik sáýlet-qurylysy boıynsha qadaǵalaý, tapsyrys berýshilerdiń tehnıkalyq qadaǵalaý qyzmetin baqylaý, avtorlyq qadaǵalaý, jobalardy ázirleý fýnktsııalary berilmek.

Jer resýrstaryn basqarý salasynda da jergilikti atqarýshy organdarǵa birqatar fýnktsııalar júktelmek. Atap aıtqanda, olardyń arasynda jer zańnamasyn buzýshylyqtardy joıý jónindegi oryndaý mindetti bolyp tabylatyn uıǵarymdardy berý, jer zańnamasy salasynda ákimshilik quqyqbuzýshylyq týraly isterdi qaraý sekildi ókilettikter bar.

Májilis maquldaǵan zań jobasy Parlament Senatyna joldanady.