Májilis mıkroqarjy jáne kollektor qyzmetterine qatysty zań jobasyn qaraıdy

NUR-SULTAN. QazAqparat - Búgin Májilis Spıkeri Nurlan Nyǵmatýlınniń tóraǵalyǵymen Palata Bıýrosy ótip, onda aldaǵy jalpy otyrystyń kún tártibi naqtylandy, dep habarlaıdy QazAqparat QR Parlamentiń Májilisiniń baspasóz qyzmetine silteme jasap.

Depýtattar qaraýyna birinshi oqylymda mıkroqarjylyq jáne kollektorlyq qyzmetti retteý máselelerine qatysty zań jobasy usynyldy.

Sonymen qatar ratıfıkatsııalanatyn zań jobalary da qarastyrylǵan. Olar: Qazaqstan Úkimeti men Bilim, ǵylym jáne mádenıet máseleleri jónindegi Birikken Ulttar Uıymy (ıÝNESKO) arasyndaǵy ıÝNESKO aıasynda mádenıetterdi jaqyndastyrý halyqaralyq ortalyǵyn qurý týraly, sondaı-aq, Qazaqstan men Grýzııa arasyndaǵy halyqaralyq avtomobıl qatynasy týraly kelisimder bar.

Ekinshi oqylymda depýtattar tehnıkalyq retteý jáne jol júrisine qarasty zań jobalaryn talqylamaq.

Aldaǵy jalpy otyrysta dene shynyqtyrý men sportqa qatysty zańnamalyq jańalyqtardy talqylaý josparlanýda.

Kún tártibiniń jobasynda memlekettik basqarý deńgeıleri arasynda ókilettikterdi qaıta bólý jáne otbasylyq jáne genderlik saıasat máselelerine qatysty zań jobalarymen jumysty jalǵastyrý usynyldy.

Sonymen qatar Májilis Eýrazııalyq ekonomıkalyq odaqqa múshe memleketterdiń temeki ónimderine aktsızder salasyndaǵy salyq saıasatyn júrgizý qaǵıdattary týraly kelisimdi ratıfıkatsııalaý týraly zań jobasyn jumysqa alady.