Májilis memlekettik organdardyń quzyretin bekitýge arnalǵan jobany maquldady

ASTANA. 7 qarasha. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik organdardyń quzyretin zańnamalyq jáne (nemese) zańǵa táýeldi deńgeıde bekitý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.

Zań jobasy Konstıtýtsııalyq Keńestiń memlekettik basqarýdy uıymdastyrý máselelerine arnalǵan qaýlysyn iske asyrý maqsatynda ázirlengen. Bul rette memlekettik organdardyń quzyreti QR Konstıtýtsııasynda, konstıtýtsııalyq zańdarynda jáne zańdarda ǵana emes, zańǵa táýeldi aktilerde de belgilenýi múmkin.

Osyǵan oraı Ádilet mınıstri Berik Imashevtyń aıtýynsha, Konstıtýtsııalyq keńestiń qaýlysyn, sondaı-aq qoldanystaǵy zańnama talaptaryn iske asyrý maqsatynda memlekettik organdardyń fýnktsııalaryn qamtıtyn barlyq zańnamalyq aktilerge taldaý jasalǵan. «Zań jobasynyń negizgi quqyqtyq túpki maqsaty tıimdi memlekettik basqarýdy qamtamasyz etýge qosymsha quqyqtyq jaǵdaılar jasaý bolyp tabylady. Alǵa qoıylǵan maqsatqa jetý úshin ártúrli memlekettik organdardyń quzyretin retteıtin qoldanystaǵy zańdar men zańǵa táýeldi aktiler deńgeıinde memlekettik organdardyń ókilettikteri men fýnktsııalarynyń ara-jigin naqty aıyrý sharasyn belgili bir logıkalyq-quqyqtyq júıege keltirýge áreket jasalyp otyr», - deıdi B. Imashev.

Budan bólek, zań jobasymen memlekettik organdardyń mańyzdy qoǵamdyq qatynastardy rettemeıtin fýnktsııalaryn qoldanystaǵy zańnamalyq aktilerden alyp tastaý kózdeledi. Bul ulttyq zańnamany jeńildetýge, memelkettik organdardyń tıimdi qyzmet etýin arttyrýǵa quqyqtyq aıany jetildirýge múmkindik bermek.