Májilis memlekettik basqarý júıesin jetildirýge baǵyttalǵan zań jobasyn maquldady

ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik basqarý júıesin odan ári jetildirý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.

Zań jobasy Elbasynyń memlekettik basqarý júıecin odan ári jetildirý jónindegi tapsyrmasyn júzege asyrý maqsatynda ázirlengen. Bul rette Prezıdent Jarlyǵyna sáıkes, Memlekettik qyzmet isteri jáne ekonomıkalyq qylmysqa jáne sybaılas jemqorlyqqa qarsy kúres agenttikteri taratylyp, QR Memlekettik qyzmet isteri jáne sybaılas jemqorlyqqa qarsy is-qımyl agenttigi qurylǵany belgili.

Osyǵan baılanysty zań jobasymen jańadan qurylatyn Agenttikke (Memlekettik qyzmet isteri jáne sybaılas jemqorlyqqa qarsy is-qımyl agenttigi) sybaılas jemqorlyq qylmystar men quqyq buzýshylyqtar, al Qarjy mınıstrligine ekonomıkalyq jáne qarjylyq qylmystar men quqyq buzýshylyqtardyń aldyn alý, anyqtaý, jolyn kesý, ashý, tergeý jónindegi fýnktsııalar beriledi. Búgingi kúni qarjy polıtsııasy organynyń tikeleı tergeýine sybaılas jemqorlyq qylmystardyń 16 baby jatqyzylǵan. Al zań jobasymen jemqorlyqqa qarsy qyzmet salasyna sol qylmystardy tergeýmen qosa, zańsyz oıyn bıznesin uıymdastyrý bóligindegi qylmystyń 17 quramy da beriledi. Al sybaılas jemqorlyq qylmystardyń úsh baby boıynsha ulttyq qaýipsizdik jáne ishki ister organdarymen birlesken balama tergeýler qarastyrylǵan. Jalpy alǵanda zań jobasymen 15 kodeks pen 66 zańǵa túzetýler engiziledi.

Ekinshi oqylymǵa ázirleý depýtattar jańadan qurylǵan sybaılas jemqorlyqqa qarsy qyzmet pen ekonomıkalyq tergeý qyzmetiniń arasynda Qylmystyq kodeks baptarynyń tergeýligin ajyratýǵa baǵyttalǵan birqatar túzetýler engizdi. Sonymen qatar, birshama ózgerister men tolyqtyrýlar zań jobasynyń jekelegen normalaryn jetildirýge, onyń erejelerin basqa zańdarǵa sáıkestendirýge baǵyttalǵan.