Májilis mamandardyń kásiptik deńgeıin taný tártibine qatysty qujatty qabyldady
Bul qujattar 2022 jyldyń 7 jeltoqsanynda birinshi oqylymda maquldanǵan edi.
«Kásiptik biliktilik týraly» Zań jobasynyń negizgi maqsaty – azamattardyń kásiptik dárejesin taný tártibimen baılanysty qoǵamdyq qatynastardy keshendi retteýdiń tıimdi quqyqtyq negizin qalyptastyrý. Zań jobasynda kásiptik deńgeıin taný arqyly eńbek naryǵyn retteý tetikterin júıege keltirýge baǵyttalǵan Ulttyq biliktilik júıesi alǵash ret engizilmek. Kásiptik biliktilikti júzege asyratyn salalyq memlekettik organdar, salalyq keńester jáne ýákiletti organ Eńbek jáne halyqty áleýmettik qorǵaý mınıstrliginiń kelisimimen kásiptik standarttardy bekitedi. Azamattardyń kásiptik deńgeıin taný úshin olardyń quzyretterin rastaıtyn sertıfıkattar berýdi Biliktilikti taný ortalyqtary júzege asyrady», - dedi Májilis depýtaty Juldyz Súleımenova.
Zań jobasymen jumys isteý barysynda depýtattar:
- salalyq memlekettik organdardyń salalyq keńestermen jáne ýákiletti organmen (Eńbek jáne halyqty áleýmettik qorǵaý mınıstrligi) kelisim boıynsha kásiptik standarttardy bekitýine;
- Qazaqstan Respýblıkasynyń Ulttyq kásipkerler palatasy Eńbek jáne halyqty áleýmettik qorǵaý mınıstrligimen kelisim boıynsha beretin taný ortalyqtaryn akkredıtteý attestatyn berýge nemese onyń kúshin joıýǵa baǵyttalǵan túzetýlerdi engizdi. Sonymen qatar, depýtattar Ulttyq kásipkerler palatasy men taný ortalyqtary Qazaqstan Respýblıkasynyń zańnamasyn buzǵan jaǵdaıda, olardyń jaýapkershiligin belgileý jónindegi normany eskerdi;
- kásiptik biliktilikti taný týraly qujatty alǵan adamdarǵa qatysty shaǵymdar rastalǵan jaǵdaıda, osyndaı qujattyń kúshin joıýǵa baǵyttalǵan túzetýler engizdi.
Bul rette osyndaı sertıfıkattar týraly málimetter Ulttyq biliktilik júıesiniń tsıfrlyq platformasynda ornalastyrylady.
«Depýtattar kásiptik biliktilikti taný rásiminen ótý kezinde múgedektigi bar adamdar úshin qajet jaǵdaı jasaý jóninde taný ortalyqtarynyń mindettemelerin belgileý bóliginde norma engizdi. Іlespe Zań Qazaqstan Respýblıkasynyń osy saladaǵy zańnamasyn «Kásiptik biliktilik týraly» Zańynyń erejelerine sáıkes keltirý, sondaı-aq mamandardyń kásiptik biliktiligin tanýdy retteýdiń biryńǵaı júıesin qalyptastyrýǵa baǵyttalǵan retteýshi tetikterdi jetildiredi», - dedi depýtat.
«Sonymen qatar, Memleket basshysynyń tapsyrmalaryn iske asyrý maqsatymen zań jobasy birqatar túzetýlermen tolyqtyryldy. «Qazaqstan Respýblıkasynyń memlekettik nagradalary týraly» Zańyna «El birligi» ordenin belgileý jónindegi normalar engizildi. Ekinshiden, «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» Qazaqstan Respýblıkasynyń Zańyna Memleket basshysynyń derbes bilim berý uıymdarynyń Joǵary qamqorshylyq keńesin qurý jónindegi ókilettikterin aıqyndaý boıynsha túzetýler qarastyryldy», - dedi Juldyz Súleımenova.