Májilis Qyrǵyzstanǵa qatysty qujatty maquldady

ASTANA. QazAqparat – Májilis «2014 jylǵy 29 mamyrdaǵy EAEO týraly shartqa Qyrǵyzstannyń qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy EAEO týraly shartty, EAEO quqyǵyna kiretin jekelegen halyqaralyq sharttardy jáne EAEO organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrda qol qoıylǵan hattamaǵa ózgeris engizý týraly hattamany ratıfıkatsııalaý týraly» zań jobasyn maquldady, dep habarlaıdy QazAqparat tilshisi.

«Qyrǵyz Respýblıkasy Eýrazııalyq ekonomıkalyq odaqqa qosylýy týraly ótpeli erejelerge sáıkes, Qyrǵyz Respýblıkasynyń EAEO-nyń kedendik shekarasyndaǵy barlyq ótkizý pýnktterin 24 aı ishinde jaıǵastyrýdy jáne materıaldyq-tehnıkalyq jaraqtandyrýdy qamtamasyz etýge ózine mindetteme alǵan bolatyn. Qyrǵyz jaǵy atalǵan merzimde úlgermedi. Osy oraıda memleket basshylary 2018 jylǵy 14 mamyrda «24 aıdan» «48 aıǵa», ıaǵnı 2019 jylǵy 12 tamyzǵa deıin ózgeris engizý týraly Hattamaǵa qol qoıǵan bolatyn. Alaıda, kórsetilgen ýaqyt Qyrǵyzstan jaǵy úshin jetkiliksiz boldy. Bul turǵyda 2019 jylǵy 29 mamyrda Memleket basshylarynyń Joǵary Eýrazııalyq ekonomıkalyq keńesiniń otyrysy aıasynda «48 aıdan» «72 aıǵa», ıaǵnı 2021 jylǵy 12 tamyzǵa deıin ózgeris engizý týraly hattamaǵa qol qoıdy», - dedi QR Premer-Mınıstriniń orynbasary-Qarjy mınıstri Erulan Jamaýbaev.

Degenmen, qyrǵyz jaǵy bul merzimde de atalǵan mindetterdi oryndaı almady.

«Sondyqtan 2022 jylǵy 19 sáýirde «72 aıdan» «96 aıǵa», ıaǵnı 2023 jylǵy 12 tamyzǵa deıin ózgeris engizý týraly hattamaǵa qol qoıyldy. Osy «72 aıdan» «96 aıǵa» deıingi Hattamany ratıfıkatsııalaý elimiz úshin áleýmettik-ekonomıkalyq jáne quqyqtyq saldarlarǵa ákep soqpaıdy jáne respýblıkalyq bıýdjetten qarajat bólýdi talap etpeıdi», - dedi mınıstr.