Májilis kedendik operatsııalardy júrgizýdi jedeldetýge negizdelgen qujatty maquldady

NUR-SULTAN. QazAqparat – Parlament Májilisiniń jalpy otyrysynda «EAEO men QHR-dyń kedendik shekaralary arqyly ótkiziletin halyqaralyq tasymaldaǵy taýarlar men kólik quraldary jóninde aqparat almasý týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Kelisimge 2019 jylǵy 6 maýsymda Peterbýrg halyqaralyq ekonomıkalyq forýmynyń aıasynda Eýrazııalyq ekonomıkalyq Keńes Alqasynyń tóraǵasy, Odaqqa múshe memleketterdiń vıtse-premerleri jáne Qytaı Halyq Respýblıkasynyń Syrtqy ister mınıstri qol qoıdy.

«Kelisimniń erejeleri aqparat almasýdyń negizgi kezeńderin, taraptardyń ózara is-qımyl tetigin jáne málimetterdiń kólemi men quramyna qoıylatyn talaptardy retteıdi. Jeke tulǵalardyń jeke paıdalanýyna arnalǵan taýarlardy qospaǵanda, syrtqy ekonomıkalyq qyzmetke qatysýshylardyń eksporttyq jáne tranzıttik deklaratsııalary boıynsha ózara derektermen almasý kózdelgen. Aqparat almasý Eýrazııalyq ekonomıkalyq odaqtyń ıntegratsııalanǵan aqparattyq júıesi men Qytaıdyń ýákiletti organynyń ulttyq aqparattyq júıesin paıdalana otyryp, kóliktiń barlyq túrleri boıynsha elektrondyq túrde júzege asyrylatyn bolady», - dedi QR Premer-Mınıstriniń birinshi orynbasary – Qarjy mınıstri Əlıhan Smaıylov.

Kelisim kúshine engen kúnnen bastap 18 aıdan keshiktirmeı málimettiń qurylymyn, formatyn, sondaı-aq aqparat almasýdyń tehnıkalyq sharttaryn anyqtaıtyn jekelegen Hattamalarǵa qol qoıylatyn bolady.

Atalǵan Hattamalar Eýrazııalyq ekonomıkalyq odaqqa múshe-memleketterdiń ortalyq keden organdary men Qytaı Halyq Respýblıkasynyń Bas keden basqarmasy arasynda jasalady jáne odan ári ratıfıkatsııalaýdy talap etpeıdi.

«Osy Kelisim boıynsha aqparat almasý kedendik operatsııalardy júrgizýdi jedeldetýge, alynǵan málimetterdi táýekelderdi basqarý júıesiniń tıimdiligin arttyrý maqsatynda qoldanýǵa jáne kedendik baqylaýdan jaltarý faktilerin anyqtaýǵa múmkindik beredi. Sonymen qatar, qaýipsizdikti qamtamasyz etý maqsatynda eki taraptyń kedendik aýmaqtaryna yqtımal qaýipti, ótkizýge tyıym salynǵan jáne shektelgen taýarlardy ákelýge baılanysty táýekelderdi azaıtý kózdelip otyr. Kelisimdi iske asyrý respýblıkalyq bıýdjetten qarajat bólýdi talap etpeıdi», - dedi Á. Smaıylov.