Májilis: Keden qyzmetteriniń Birikken alqasy týraly shartqa túzetýler engizildi

NUR-SULTAN. QazAqparat – Parlament Májilisiniń jalpy otyrysynda «2011 jylǵy 22 maýsymdaǵy Keden odaǵyna múshe memleketterdiń keden qyzmetteriniń Birikken alqasy týraly shartqa ózgerister engizý týraly hattamany ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Keden qyzmetteri Birikken alqasynyń negizgi mindetteri: keden qyzmetteriniń ózara is-qımyldaryn úılestirý, óz quzyreti sheginde keden zańnamasynyń birkelki qoldanylýyn qamtamasyz etý, keden isi máseleleri boıynsha biryńǵaı quqyqtyq bazany qalyptastyrýǵa qatysý.

«Ózderińizge belgili, 2015 jylǵy 1 qańtardan bastap EAEO-ny qurý týraly shart kúshine endi. 2017 jyly odaqtyń jańa Keden kodeksi qabyldandy. Osy ózgerister keden qyzmetteriniń birikken alqasynyń shartyna túzetýler engizýge negiz bolyp otyr. Hattamaǵa 2019 jyly tamyzda úkimet basshylary qol qoıdy», - dedi Qarjy mınıstri Erulan Jamaýbaev.

Hattamada kelesi máseleler kózdelgen:

Birinshiden, múshe memleketterdiń Ortalyq keden organdary anyqtaldy. Qazaqstanda - bul Qarjy mınıstrliginiń Memlekettik kirister komıteti.

Ekinshiden, Birikken alqanyń birqatar fýnktsııalary Eýrazııalyq ekonomıkalyq komıssııaǵa berilýine baılanysty alynyp tastaldy.

Úshinshiden, kedendik ákelý bajdaryn esepke alý jáne bólý jónindegi kelisilgen qaǵıdalardyń qoldanylýyn qamtamasyz etý bóliginde Birikken alqanyń quqyqtary alynyp tastaldy.

Tórtinshiden, sharttyń erejeleri Odaq týraly shart pen Odaqtyń Keden kodeksiniń termınologııasyna sáıkes keltirildi.

«Atap aıtsaq, «Keden odaǵy» degen sóz «Eýrazııalyq ekonomıkalyq odaq» dep, «keden qyzmetteri» degen sóz «keden organdary» dep ózgertildi. Hattamany ratıfıkatsııalaý bizdiń elimiz úshin áleýmettik-ekonomıkalyq jáne quqyqtyq saldarǵa ákep soqtyrmaıdy jáne memlekettik bıýdjetten qarajat bólýdi talap etpeıdi», - dedi mınıstr.