Májilis Qazaqstan men Belarýs arasyndaǵy halyqaralyq avtomobıl tasymalyn damytýǵa baǵyttalǵan qujatty maquldady

ASTANA. QazAqparat - Búgin Parlament Májilisiniń jalpy otyrysynda palata depýtattary «2004 jylǵy 19 qańtardaǵy Qazaqstan Respýblıkasynyń Úkimeti men Belarýs Respýblıkasynyń Úkimeti arasyndaǵy halyqaralyq avtomobıl qatynasy týraly kelisimge ózgerister engizý týraly hattamany ratıfıkatsııalaý týraly» zań jobasyn maquldady.

«Belarýs halyqaralyq avtomobıl tasymaldaý salasynda Qazaqstan úshin asa mańyzdy. Eýropaǵa ótetin tranzıttiń 75 paıyzy Belarýs aýmaǵy arqyly jasalady. Sonymen qatar, Qazaqstan men Belarýs arasyndaǵy tasymaldardyń udaıy ósip kele jatqanyn eskersek, bul zań jobasynyń mańyzy zor», - dedi Investıtsııalar jáne damý birinshi vıtse-mınıstri Jeńis Qasymbek.

Onyń aıtýynsha, Belarýs elimen aradaǵy tasymal ósimi 27 paıyzdy quraǵan. Al qaralyp otyrǵan kelisimge sáıkes, Qazaqstan men Belarýs arasyndaǵy ekijaqty jáne tranzıttik tasymaldar jasaýǵa ruqsatsyz júıe engizý usynylady. Bul júıe eki el arqyly tranzıttik tasymaldaýdy, sondaı-aq eksporttyq-ımporttyq tasymaldardy kedergisiz jasaýǵa múmkindik beredi.

«Qazirgi tańda Qazaqstan 42 elmen ekijaqty tasymaldaý boıynsha ekijaqty kelisimder jasap otyr. Bul kelisim elimizdiń tasymaldaýshylary úshin tıimdi», - dedi J. Qasymbek. Hattama ratıfıkatsııalanǵannan keıin otandyq tasymaldaýshylar Qazaqstan-Belarýs avtotasymal naryǵyn belsendi ıgere bastaıdy.

Májilis maquldaǵan zań jobasy Parlament Senatyna joldanady.