Májilis Ekologııalyq kodeks jobasyn birinshi oqylymda maquldady
«QR keıbir zańnamalyq aktilerine ekologııa máseleleri boıynsha ózgerister men tolyqtyrýlar engizý týraly zań jobasy jańa Ekologııalyq kodeks jobasynyń normalaryn iske asyrý maqsatynda ázirlendi. Zań jobasynda 9 kodeks pen 9 zańǵa ózgerister men tolyqtyrýlar engizý kózdelgen. Alaıda zań jobasyn qaraý barysynda Ákimshilik quqyq buzýshylyq týraly kodekske jáne salyq zańnamasyna ózgerister men tolyqtyrýlar engizýdi shekteý jáne ońtaılandyrý bóligi qaraldy. Osylaısha qoldanystaǵy zańnamanyń talaptaryn saqtaý maqsatynda zań jobasynan Ákimshilik kodekske, Salyq kodeksine engizýge usynylǵan túzetýler alynyp tastaldy», - dedi zań jobasy týraly depýtat Mansurhan Mahambetov.
Onyń aıtýynsha, zań jobasynda Ekologııalyq kodeks jobasymen usynylyp otyrǵan tabıǵat paıdalanýshylardy eń úzdik qoljetimdi tehnologııalardy paıdalanýǵa yntalandyrý, ekologııalyq quqyq buzýshylyqtar úshin jaýaptylyqty arttyrý josparlanǵan. Sondaı-aq «jasyl» tarıfterdi engizý arqyly qaldyqtardy qaıta óńdeý segmentin damytýdy yntalandyrý, ekologııalyq retteý men baqylaýdaǵy jańa tásilder sııaqty jańalyqtardy iske asyrý úshin quqyqtyq negizder qurý maqsatynda qoldanystaǵy zańnamaǵa ózgerister engizý kózdelip otyr.
«Jumys toby sheńberinde kelip túsken usynystar men túzetýler qaraldy. Olar mindetti ekologııalyq saqtandyrýǵa baılanysty máselelerdi retteýdi, ruqsat qujattaryn alý bóliginde Orman jáne Sý kodeksterine ózgerister engizýdi, medıtsınalyq qaldyqtarmen jumys isteý jónindegi qyzmetti retteýdi qorshaǵan ortany qorǵaý salasyndaǵy ýákiletti organnyń qaramaǵyna berýdi kózdeıdi. 300-den astam usynys qaralyp, talqylandy, olardyń kópshiligi boıynsha sheshim qabyldandy. Al bir bóligi Úkimetke qorytyndy alýǵa jiberildi. Tutastaı alǵanda zań jobasy boıynsha jumys tobynyń 4 otyrysy, komıtettiń keńeıtilgen otyrysy, sondaı-aq ártúrli alańdarda komıtettiń 2 kóshpeli jáne 2 keńeıtilgen otyrysy ótkizildi. Barlyq komıtet zań jobasy boıynsha oń qorytyndylaryn berdi», - dedi ol.