Májilis EAEO aıasyndaǵy taǵy bir zań jobasyn maquldady

NUR-SULTAN. QazAqparat – Májilis depýttary Eýrazııalyq ekonomıkalyq odaqtyń tehnıkalyq reglamentterinde talaptar belgilenbegen ónimniń ishki aınalysynyń tártibi men mundaı ónimderiniń qaýipsizdigin qamtamasyz etý qaǵıdalaryn belgileıtin kelisimdi ratıfıkatsııalaý týraly zań jobasyn maquldady, dep habarlaıdy QazAqparat.

Zań jobasyn Májilis ókilderine Saýda jáne ıntegratsııa mınıstri Baqyt Sultanov tanystyrdy.

«Qujattyń negizgi baǵyttary odaq aýmaǵynda aınalystaǵy barlyq ónimderdiń qaýipsizdigin qamtamasyz etý. Birinshiden, bul odaq deńgeıinde ónimge qatysty mindetti talaptar belgilenetin ónimniń biryńǵaı tizbesine engizilmegen ónimder. Ekinshiden, odaqtyń biryńǵaı tehnıkalyq reglamentteri qabyldanbaǵan nemese kúshine enbegen ónimder. Ónimniń biryńǵaı tizbesi tutyný jáne paıdalaný kezinde qaýiptiligi joǵary táýekeldermen sıpattalatyn ónim túrlerin qamtıdy», - dedi mınıstr.

Mınıstr búgingi tańda aınalysqa shyǵarylatyn ónimniń 85%-y Eýrazııalyq ekonomıkalyq odaqtyń biryńǵaı tehnıkalyq reglamentimen retteletini aıtady. Qalǵan 15%-dy búgin usynylyp otyrǵan zań retteıtin bolady.

«Biz taýarlar nomenklatýrasyna taldaý jasadyq. Negizinen bul áleýetti qaýip tóndirmeıtin ónimder. Mysaly aıta ketsek, zerger buıymdary, saǵat, turmystyq şetka, jasandy zerger buıymdary jáne t.b.», - dedi Baqyt Sultanov.

Vedomstvo basshysy qabyldanǵaly otyrǵan kelisim bıznes úshin ákimshilik kedergiler týdyrmaıtynyn atap ótti.

«Ónim týraly málimetterdi aqparattyq bazada jınaqtaý kózdeledi. Olar tutynýshylar úshin qoljetimdi jáne naryqtaǵy jaǵdaıdy zertteý maqsatynda paıdalanýǵa ashyq bolady.

Bul jańa ónim túrleriniń paıda bolýyna jedel den qoıýǵa jáne turaqty monıtorıng júrgizýge múmkindik beredi» - dedi mınıstr.

Mıınıstrdiń sózine qaraǵanda, Reseı, Belarýs jáne Qyrǵyzstan búginge deıin atalmysh kelisimdi ratıfıkatsııalaý boıynsha memleketishilik rásimderdi aıaqtap qoıǵan.

Májilis depýtattary zań jobasyn biraýyzdan maquldap, daýys berdi.