Májilis depýtatynyń yqpalymen 15 mln teńgege satylyp ketken mektep memleketke qaıtaryldy
Májilis depýtaty Maqsat Tolyqbaı biraz ýaqyttan beri Almaty oblysynda ornalasqan M. Lomonosov atyndaǵy jalpy orta bilim beretin mektep máselesimen aınalysyp keledi. Jýyrda Májiliste ótken Úkimet saǵatynda da depýtat atalǵan bilim ordasyn tez arada memleketke qaıtarý kerek ekenin aıtyp, máseleni taǵy kóterdi.
«Bul sumdyq nárse ǵoı. Bir úlken mektepti 15 mln teńgege satyp jiberý degen. Bul qaı ákimniń tusynda, qalaı satylǵanyn anyqtaý ońaı emes, bárin bilip otyrmyz. Tez arada qaıtaryńyzdar», - degen bolatyn.
Búgin belgili bolǵandaı, Almaty oblysynyń ákimi Marat Sultanǵazıev Qarasaı aýdanyna qarasty Shalqar aýylyndaǵy 15 mln teńgege jekemenshikke satylǵan mektep osy jyldyń 8 maýsymynda memleket menshigine qaıtarylǵanyn aıtty.
«Mektep tapshylyǵy bar. Bizde 51 mektep úsh aýysymda oqytady. Naqty osy mektep týraly aıtsaq, biraz sottastyq. 8 maýsymda alǵan adam óz erkimen mektepti úkimetke qaıtaryp berdi», - dedi oblys basshysy.