Májilis depýtatymen kezdesýde aýyl sharýashylyǵyndaǵy túıtkilder kóterildi - Túrkistan oblysy

NUR-SULTAN. QazAqparat - Májilis depýtaty, «Aq jol» partııasynyń múshesi Azamat Ábildaev Túrkistan oblysyna sapary barysynda aýylsharýashylyq máselelerine erekshe nazar aýdardy, dep habarlaıdy QazAqparat tómengi palatanyń baspasóz qyzmetine silteme jasap.

Depýtat Saıram aýdanyndaǵy egin sharýashylyǵy, mal sharýashylyǵy, jeńil ónerkásip salalaryna mán berip, oblystaǵy eń iri mal bordaqylaý kesheni bolyp sanalatyn «Nurym Grýpp» JShS-ne bardy. Olar jańa tehnologııalardy endire otyryp, qosymsha 5 myń bas buqashyq alyp, bordaqylaý keshenniń syıymdylyǵyn 12 myń basqa jetkizgen. Onymen qosa, depýtat bul mal bordaqylaý kesheninde qosymsha qurama jem shyǵaratyn tseh jáne mal soıý alańynyń jumysymen tanysty.

Seriktestik basshylary búgingi tań­da mal bordaqylaý ala­ńyn­­da 12 000 bas iri qara mal baryn aıtty. Onda 5000 tonnaǵa deıin et da­ıyndalady. Bir jyldyq tabysy 3 mlrd teńgeni qurap, 60-taı adam turaqty jumyspen qamtyp otyr.

Kezdesý barysynda depýtatpen birqatar mańyzdy problemalar talqylandy. Kásiporyn ujymy et ónimderin eksporttaý bary­syn­daǵy kedergilerdi azaıtyp, qyzyl etti eksportqa shyǵarýǵa jol ashý, eń bastysy sýbsıdııa máselesin kóterdi. Aıta ketý kerek, elimizde sýbsıdııanyń 40 tan asa túri bar, kólemi birshama ósip te keledi.